Shillong: Ka bor sorkar ka la hap ban sangeh noh ban wad ia u samla uba la ngam jyllop ha pung Umiam hadien ba kim lap dien satia ia u wat hadien ba la ngam palat 200 phut shapoh ka pung Umiam bad 7 sngi kynthih.
U samla Pynskhemlang Kharkhrang na ka shnong Umroi Nongrah, ula ngam jyllop ha ka 26 tarik Naitung 2025 ha pung Umiam bad ha katei ka sngi hi, ka kynhun Search and Rescue Team (SRT) kila leit wad mar mar tangba ki khlem lap ia u bad dei ha ka 28 tarik, kila pyrpad ia ka District Disaster Management Authority (DDMA) ka East Khasi Hills ban pan jingiarap na ka State Disaster Response Force (SDRF) ban leit wad lang hadien ba kim pat lap. Dei ha ka 29 tarik, la khot sa ia ka National Disaster Response Force (NDRF) na Guwahati kiba la wan 30 ngut namar ba ki kham biang ki tiar ki bor ki kor kiba kham khlain ban ngam shaduh 200 phut shapoh um.
Hynrei haduh ka 1 tarik Nailar kila sangeh noh hadien ba kim lap satia ia u samla Pynskhemlang.
Haba kren bad u Chief Executive Officer ka District Disaster Management Authority (DDMA) u bah Shanlangbor Warjri, MCS, u la ong ba katkum ka jingai jingmut jong ki NDRF, SDRF bad S&RT ka jinglap ia ka met ka dei ban long ar sngi ne 48 kynta, lada ym dei ba ka met ka shah woh ne shah ban ha ki maw ne sahkut shapoh, ka la dei ban per sha sla um. Hynrei kaba lyngngoh ka long ba u bah Pynskhemlang um shym la per sha sla um bad kawei pat ka lah ban dei ba shah dait ha ki dohkha namar ba ka met u briew ka don lyer bad haba khlad ka per sha sla um hynrei lada shah pynpei ne shah pong ka met ba ka la jem, ka lah ban ym per shuh sha sla um.
U bah Shanborlang ula iathuh ba namar ba kim lap wat haduh ba la ngam shapoh 200 phut ruh, bad halor kine ki daw, kila sangeh noh ban ngam ban wad ia ka met jong u.
Halor kane, ula iathuh ba la iakynduh la iakren bad kiba haiing hasem jong une u samla ha kaba kila pynpaw ka jingsngew hun jongki halor kane.
Sangeh wad ka S&RT, SDRF bad NDRF ia u samla ba ngam ha pung Umiam
