Shillong: Ka lympung ialehkai Shillong Premier League 2025, la sdang ia ka hadien ba ka kynhun ialehkai ka Nangkiew Irat ka la lah ba kan ioh khur ia ka nam jop ka jong ka, hadien ba ka la hah tam shwa shi por da shi kol, hynrei ban lah pat ban pynliem ia ka Nongrim Hills da 3-1.
Ka khana jong kane ka jingiakhun ka long ba u Caldolan Kharmawphlang ka Nongrim Hills u la lah ban ioh thep iaka kol kaba nyngkong ha ka minit kaba 13, kaba la wan lyngba ka corner.
Pynan na ka liang ka Nangkiew Irat kaba la lah ban bat ia ka kyrdan kaba saw, na ka samoi ialehkai ba ka la dep, ka lap a ioh ban pynphai shwa ia kane ka shi kol kaba jia ryngkhat ruh ba dei ka kol aba la kum bakla ban shut hi sha la ka jong ka kol da u player ka Nongrim Hills, pynban ha ka kylla miet, tang hapdeng ki khyndiat minit, ka la ioh pat ba kan thep ia ki ar kol ki jong ka lyngba u Jefferson Pakyntein (60′) bad Himanshu Patil (62′).
Haba phai biang sha ka kol kaba la kum thep bakla da ka Nongrim Hills sha la ka jong ka kol, ka wan hadien ba u kapten u jong ka u Bankit Nongrum, ha ka jingbakla u la ioh kum pyndei ia ka bol kaba la ioh ban head ia ka da u Himanshu, kaba la ai jingim biang sa shisien ia ka Nangkiew Irat ba kan khie la ka jong ka khlieh ha kane ka jingiakhun.
Ka janmiet ba sdang ia kane ka lympung ialehkai ka SPL mynta ka samoi, ka la sdang artad da ka jingwan ban ther u slap, kaba la kham pynshimtom bha ia ki player ki ar kynhun ban lah ban ialehkai bha.
Shw aban sdang ka jingiakhun, ka la don ka jinghiar ban kitbol ia ki player jong baroh artylli ki team ia kaba la lam khmat ia ka da u Presdient ka SSA bah Banteidor Lyngdoh MLA., ki dkhot ki jong ka bad bah Hamletson Dohling President ka MFA.
Lashai ka sngi, ka jingiakhun kan long hadpeng ka Sawmer SC pyrshah ia ka kynhun kaba wan ba-ar ha ka samoi ba la dep ka Mawlai SC, kaban long ha ka por 5:30 janmiet.
Sang ka SPL ka SSA, pylliem ka Nongkiew ia ka Nongrim 3-1
