Shillong: Ka KSU Umiam Circle ka la ioh bat u briew uba kam ialade kum u pulit bad uba pynrung be-aiñ ia ki bar jylla sha ka jylla Meghalaya Umiam.
Ha ka kyrwoh mynta ka sngi ka 6 Nailar 2025, ka Khasi Students’ Union (KSU), Umiam Circle, hapoh ka jingïalam jong u President Bashem Kharnaior ha ka por 6 baje mynstep ki lah ioh jingtip ia ka jingdon jong ki Mynder kiba wan lyngba ka kali AS 25 CC 4375, bad la suba ba la ialam ia kine ki mynder da utei u briew uba kam ialade kum u pulit.
Katkum katei ka jingtip, la ïathuh ba utei u briew u la pyni ïa ka Police Identity Card kaba don kyrteng kum u Brill Rongpeit, ha kaba la kam ba la pynmih da ka ophis jong u Commandant, 1st Battalion, Meghalaya Police, Mawiong, Shillong.
Ha ka por jong ka jingïakren bad ka jingbishar, ka KSU ka la lap ba utei u briew u la lum pisa haduh ₹1,000 na man la uwei pa uwei na kitei ki san ngut ki bar jylla kiba la shong ha katei ka kali bad la ong ba katei ka pisa ka dei kum ka bai rung sha ka jylla. Hynrei ha ka por ba ka seng ka dawa ban pyni ïa ki kot ki sla ban pynshisha ïa katei ka jinglum pisa, utei u briew uba kam ialade kum u pulit lem bad kitei ki san ngut ki bar jylla ki la phet krad noh na ka jaka, khlem ai jingpynshai eiei.
Ka KSU Umiam Circle ka la pyntip noh mar mar sha ka KSU Mawlai Circle ban ïatreilang ha ka jingbuddien bad ban lap ïa kito kiba donkti, namar kane ka jingjia ka pyni ba ka don ka jingkheiñ sting ha ka rukom peit ïa ka jingrung jingmih ki mynder bad ka lah ruh ban don ka jingïatreilang kaba be-aiñ kaba ai lad ïa ka jingrung be-aiñ jong ki bar jylla.
Ka jingphet krad noh jong kitei ki briew ha ka por ba kylli jingkylli, ka pyni ba ka don ka jingthmu ban pyniap ïa ka jingshisha. Ka KSU ka dawa mardor na ka Police Department ban pynshai ïa ka jingshisha jong u briew uba la tip kyrteng kum Brill Rongpeit.
Ka KSU ka la ong ba kane ka jingjia ka pynkhih ïa ka jingshaniah jong ki paidbah ia ka tnat pulit, khamtam haba ym shym lada kam don kano kano ka jingshai lane ka jingkit khlieh kaba biang na ka liang ki bor synshar. Lada ka long kaba suk ba ki briew kin pyndonkam ïa ka ID pulit khlem hok, kane ka pynpaw ba ka don ka jingsynjor ha ka jingpeitngor na ka liang kiba don ha ka aiñ.
T. 1000 marwei shim uba kam pulit ban pynrung ia ki bar jylla|pan jingshai ka KSU na ki pulit
