Shillong: U myntri sorkar jylla u bah AL Hek ula ong ba ula iohi ha ki lad pathai khubor bad ha ki social media ba ki nongtrei ka Garo Hills Autonomous District Council (GHADC) kim ioh tulop la 42 bnai eiei, kaba la wanrah ka jingdum buit ia u, kumno ki ia pyndap ia ki jingdonkam.
Haba kren mynta ka sngi, u bah Hek uba dei ruh u nongialam ka BJP Meghalaya, u la ong ba ula ju iohi shane haba ki nongtrei kim ioh tulop 2-3 bnai, kila ia iam hynrei u sngew lyngngoh kumno ki nongtrei ka GHADC pat ki ia im.
U bah Hek ula ong ba ka jingkylli kaba jwat bha ka long kumno ki im kumno ki pyndap ia ki jingdonkam khlem ioh tulop la 42 bnai. U la ong ba lada u trai um siew ia u nongtrei uba trei bhai a ka kam, ka long bym dei hynrei lada um trei kata ka long da kumwei.
Halor ka jingdawa ki BJP na Garo Hills ka la iakynduh ia u Lat ka jylla u CH Vijashankar ban pynjari synshar administrator ha GHADC, u bah Hek ula ong ba ka shong ha ka jingshongnia ka jingdawa bad na ka bynta ka jingbit jingbiang ki nongtrei bad ki paidbah, ka sorkar bad ka bor ba dei peit ka dei ban leh.
Lah ban kdew ba ka TMC dang shen hapoh ka jingialam u Dr. Mukul Sangma kila iakynduh ia u Lat ban kyrpad ba un tuklar ban khot ia ka dorbar kyrpang, nalor ka jingbym ioh tulop ki nongtrei bad kiwei kiwei ki mat.
Hangne lada kim ioh tulop 2-3 bnai, ki ki la ia iam, ha GHADC pat 42 bnai kumno ki ia im: AL Hek
