Shillong: U Nongialam ka National People’s Party (NPP)u Marcuise N Marak ula ong ba ka rilum Garo kan pdiang beit ia ka lynti rel lada dei shano shano ruh kampher hapoh rilum Garo.
U Marcuise uba dei ruh u myntri sorkar, ula ong ba watla ki paidbah ka rilum Khasi kim pdiang ia ka lynti rel, ka rilum Garo kan pdiang beit ban pyniar shuh ia ka lynti na Mendipathar sha kiwei ki jaka ha rilum Garo.
Haba kren mynta ka sngi, u Marcuise ula ong ba u MLA ka Siju-Ronggara u Rakkam A Sangma ula dep ban dawa ban pynpoi lynti rel haduh Baghmara bad kala don ruh ka jingdawa ban pynpoi sha West Garo Hills.
Ula ban jur ba ka jingpynpoi ia ka lynti rel na Mendipathar sha kiwei pat ki jaka kan ai jingmyntoi shi katdei eh ia ka thain, khamtam da ka jingpyndep ia ka jingkieng halor ka Wah Brahmaputra ka ban pyniasoh na Phulbari sha Dhubri.
Katkum ka jingong u myntri, ka jingpynpoi lynti rel kan pynkhlain ia ki lad pyniasoh hynrei kan kyntiew ruh ia ki kam khaii pateng ha West Garo Hills.
U la pynpaw ia ka jingsngewhun namar ba ka lynti rel ban pyniasoh haduh Baghmara kan iaid lyngba ka Williamnagar, ka ban ai jingmyntoi bha ia ka thain.
Pyniaid rel naei shaei ruh ha rilum Garo kampher eiei, ngi pdiang beit: Marcuise
