Shillong: U hymmen ka Sonam, u Govind Raghuvanshi ula kwah ban pynshai paidbah halor ka jingiadei ka jingkyntiew kurim ka Sonam bad u Raja Raghuvanshi, ba ka dei ka jingpynbeit na baroh ar liang ne arranged marriage.
La kyntiew kurim ia ki hadien ba kila iamynjur baroh ar ngut bad kam don kano kano ka jingpynbor ia ki ban iashong kurim. Tang kawei ka daw ka long ba hadien ka 11 tarik Jymmang 2025, ka Tarik ba ju bha bok ban shong kurim ka long sa lai snem hadien, kaba lah ban shim por slem bad na kane ka daw, baroh ar ngut u Raja bad ka Sonam kila shah pynbor da ka jingieid ban iashong kurim noh bad kila mynjur baroh ar ngut bad baroh ar liang, kiba haiing kila pdiang bad kmen ia kane ka jingialong kawei jongki.
U Govind ula ong ba baroh ki dei ki longing kiba suk ba kmen bad kiba don burom don akor bad kin iai bteng ia kane.
Ka apot kaba la jia hadien khyndiat sngi hadien ba la kyntiew kurim, ka la pynshaiong ngain ia baroh kiba haiing, namar ba kila sakhi ia ka jingkmen ka jingiarkhe sadhai kine ki shijur ha ka por ba ki iathoh bad hadien ba la dep iathoh bad kim iohi eiei ban don kano kano ka jingeh hapdeng jongki lait noh ki jingbakla ba malu mala ha kaba ka shem jingeh ban suba ba kan ialam shaduh u pud ban pyniap.
U Govind ula ong ba naduh ba u Raji bad ka Sonam kila jah rngai ha ka 23 tarik Jymmang 2025, haduh mynta ki ngeit ba ki shijur ki la shah buddien, shah kthong bad shah thombor bad ki don shibun ka jingsngew tieng ha ka jingmut jingpyrkhat.
U la pynshai ruh ba ki don 4 ngut kiba suba kiba la shah kem halor ka jingshah pyniap u Raja bad lah ban don shuh ruh bad kiba haiing u Raja kim tip kim ithuh ia kine kiba shah kem hynrei kiba haiing ka Sonam ki tip bad ithuh tang ia u Raj Kushwaha uba dei na ka jait bynriew Kachhi ne Other Backward Caste (OBC) kiba dei na ka jait ba kham poh bha.
U Raj u trei ha ka karkhana jong ka longing ka Sonam bad um sah hajan ka iing ka Sonam bad u sah sha kawei ka jaka ha kawei ka iing bad ki ju iohi teng teng ba u iakynduh ia ka Sonam bad ki mut ba ka jingiadei jongki ka long kum shipara bad ka long kaba eh ban ong ba ki don jingiadei samla ne ka don ka jingia-ai pisa kylliang hapdeng jongki.
Katkum ka jingong u Govind, u Raj Kushwaha ula shoh jingmut bha ia ka spah ka phew jong ka longing ka Sonam bad u ju iaroh bha. Lehse don ka jingkhmih lynti bad u ju kynduh ia ka Sonam teng teng ha kaba iadei bad ki kam jong ka karkhana bad ka iing ka sem kam don jingtip eiei ia kaei kaba la jia ne kaban sa jia namar ba ki bunkam ha la ki kam bad ma u bad ka ing ka sem ka Sonam ruh kim don jingtip shaphang u Raj Kushwaha.
U la ong ruh ba haba peit ia ka jingshah pyniap bad ka jingmih na ka jingtohkit, ki sngew ba ka lah ban don shuh kiba donkti bad ka lah ban don ka jingiasylla kaba jur bha ha kaba ia u nongpynkhreh ia kane ka kam ne u nongplan, ym pat lap satia bad ki don ka jingshaniah ha ki pulit bad ka kashari.
Ha kaba iadei bad ka para jongu ka Sonam, u Govind ula ong ba ka dak ba lap ia ka jaka ba ka don, ka paw ha ka miet 8 bad 9 tarik Jylliew 2025 ha por 1 baje eiei mynstep haba u ioh ia ka phun na u number bym tip. Ha kata ka por, u Govind u iathuh ba u don ha Shillong, Meghalaya bad haba u jubab ia ka phone, ula ioh sngew ia ka jingiam ka kynthei bad ka la ong ba ka dei ka para jong u bad ka la ioh lad ban phun da ka jingiarap lem kiwei bad ka la lait phet na ka jingshah rahbor ki gang ban poi sha katei ka jaka. U Govind ha kata ka por, ula shaiong ngain bad ka para jongu kam shym lah shuh ban kren shwa ban buh noh ia ka phun.
Ha kata ka por, da ka jingiarap u trai ka phun katei ka jaka ba ka don ka Sonam, ula phun noh da ka video bad u iohi ia ka kynthei lyngba ka video call bad u sngewthuh ba ka dei ka para jong u, ka Sonam bad ka la long ktah bha ia ka jingmut jingpyrkhat kumba kam thiah bad thngan bad kam I lah ban kren slem.
Shuh shuh ula iathuh ba u tip na u trai ka mobile ba ka Sonam ka don ha Dhaba hajan surok bad ka long shngain bad kane ka dhaba ka don hajan ka surokbah Varanasi-Ghazipur ha
Ghazipur, Uttar Pradesh. Da ka jingiarap utei u trai ka dhaba, ula phah bor iada ia ka bad u pyntip sha ka police station kaba jan tam.
Hadien kane, ki pulit ka Uttar Pradesh kila poi bad ialam ia ka sha Police Station bad ka jingjia ka la long wut wut bad um ioh ban kren bha bad ka Sonam.
La buh ia ka Sonam ha ka “Sakhi One-Stop Centre” ha Nandganj Police Station ha Ghazipur bad la ai ka jingiada hadien ba ki pulit ka Meghalaya kila phikir bha bad la ai jingsumar kum ka First-Aid Facilities, bad kiwei.
U Govind ula batai ruh ba ha kawei ka liang, u sngew suk mynsiem haba lap ia ka para hynrei ha kawei ka liang, ka jingmut jongu, ka la dap da shibun ki jingtieng bad ula mih noh na Shillong wut wut bad ula poi ha Ghazipur ha ka sngi kaba bud. Ynda ula poi ha katei ka jaka ula kynduh ia ka Sonam hapoh ka Police Station, kala bat bad kdup ia u trait da kaba iam paid dohnud kumba 2-3 minit eiei ka khlem lah ban kren eiei hynrei ka shu ong, ba kam leh eiei bad ma u ruh, um sngewthuh eiei ia kane ka jingkren jongka bad ula kylli ia ki jingkylli kyllum shaphang ka jingkoit jingkhiah, ka jingmynsaw bad kiwei. Na ka rukom leh jongka, la pyni shibun ki mutdur bad ula sdang ban pyrkhat ha ki bynta bapher bapher.
Ula iakren tuk tak bad ka bad ula mih noh ban kynduh ia ki briew ha Police Station bad hadien kane, u khlem iakynduh shuh ia ka Sonam.
U Govind ula iathuh ruh ba hadien kane, u sa tip na ki lad pathai khubor ba ka kyrteng ka Sonam ka la paw kum kawei kaba suba donkti ban pyniap ia u Raja, bad hangne ka la kah dum ngain ka pyrthei ia u, namar ka longing jong ki ka im ha ka imlang sahlang kaba la shai kaba stad, kaba bud ia ka kolshor, kaba suk kaba kmen bad um sngew lah ngeit ba ka para jong u, kan leh ia kane ka kam runar bad um lah ngeit ba ka Sonam kan iadon bynta ha ka jingiasylla ha kane kam kaba shyrkhei.
U Govind ula ong ba ka iing jongki, ka long kaba ieng pdeng bad namar ba ka Sonam ka dei kaba la suba donkti ha kane ka kam, dei ban tohkit khlem ka jingshah shiliang kumba leh ia kiwei kiba suba donkti bad lada shem ba ka Sonam ka donkti shisha, ka dei ban ioh ia ka jingpynsaja kaba shyrkhei tam katkum ka ain bad lada shem ba ka dei kaba plan ia kane, ka dei ban shu rai pyniap beit, namar ba ym tang ba ka pynjot ia ka jingiadei hapdeng ki ar tylli ki longing hynrei ka la pynjot ia ka shaniah ha ka ri baroh kawei.
Ha kajuh ka por, ula ong ba katba ka jingtohkit ka dang, la kyrpad ia ki lad pathai khubor bad ki paidbah ba kin kiar na kaba pynbna kum ki nongbishar hynrei ban ap haduh ban pynbna ka kashari ia ka rai. Ula kyrpad ruh ia ki pulit, ka sorkar ka Meghalaya ba kin pynbiang ia ki jingdonkam ka Sonam katkum ka ain, ka hok briew man briew jongka bad ka hok ban iasaid.
Ula kyrpad ia ka para ba kan ai ka jingiatreilang ha ka jingtohkit jong ki pulit ban sei madan ia ka jingshisha, ban kren ia ka jingshisha khlem jingtieng bad na ka iing jong u ruh, kin ai ka jingiatreilang ia ki pulit ka Meghalaya.
Ula pan mab ruh ia ka jingkren palat ha kine ki sngi bad ula ai khublei ia u myntri rangbah ka Meghalaya, ki pulit ka Meghalaya, ka SIT, kumjuh ia ki pulit ka Madhya Pradesh, ia ka sorkar bad u myntri rangbah katei ka jylla, nalor u Amit Shah u myntri kam pohiing ka ri, bad kiwei kiba la iarap .
Pynshai u hymmen ka Sonam, kumno u lap ia ka katba u dang don ha Shillong, u Raj u dei u OBC
