SOHIONG 10, Jymmang: Ka elekshon ban jied ia u MLA ka Sohiong ha kane ka kynti ka la shai byrngut byrnget ba kiba lah ban iaknieh ia u nam tam, kan long hapdeng ka Bom ka UDP bad ka Kot ka NPP.
Ka jingthep vote ha Sohiong kaba la sdang ha ka por 7baje mynstep ka la kut mynta ka sngi ha ka por 4 baje janmiet ha ki 60 tylli tam ki jaka thep vote jong u paidbah nongjied kumba 34 hajar ngut tam ha kane ka konstitwensi.
Kine ki ar tylli ki parti ki dei kiba don lang ha ka sorkar MDA-2, ha kaba ka NPP ka la ialam katba ka UDP ka iadon bynta lang. hynrei ki don ki jaka ha kaba ka Kti ka Congress ka khlain tangba ka long jar jar, kaba lah lehse, ban pynkyndit pynban ha ka sngi niew vote. Kiwei ki parti kum ka HSPDP, BJP, TMC kim da paw than ha kane ka jingiakhun.
Ka jingniew ia ki vote kan long ha ka 13 tarik Jymmang 2023. Na bynta ka UDP lada ka jop kan nang pynkhlain ban pynsawa sur ha ka sorkar katba, na bynta ka NPP kan pynkhlain shuh ba kan thom naphang khlem da sngap ia kiwei ki parti namar ba ka la jan kot ban synshar marwei.
