NONGPOH 09, Jymmang: Ha ka step phyrngap mynta ka 9 tarik Jymmang 2023, kumba hynniew tylli ki dukan ba kynthup ia ka dukan die soh bad dukan die sha ki la ingkhong khait na ka jingbam duh ki thylliej ding ha ki ar tylli ki jaka, kata hakhmat jong ka Nongpoh Town Shopping Complex bad sa kawei de hakhmat jong ka Meghalayan Cooperative Apex Bank.
La iathuh ba kane ka la jia ha ka por kumba 2 baje eiei mynstep ha kaba la lap nyngkong da ka kynhun iaid pahara jong ka E/67 Bn ka CRPF kaba don ha Nongpoh ki ba don kumba lai kynhun ki la leit mareh ban iakhun pynlip ia katei ka ding kaba la klang da kaba theh da ka um na ka pung kaba don Marjan bad kila pyntip ruh sha ki bor pulit ka thanad Nongpoh kiba la wan poi pat kham hadien.
Lyngba ka jingshimkhia ki pulit CRPF, katto katne tylli ki kali ki ba la pynsangeh hakhmat kitei ki dukan ruh ki la lait na ka jingkem ding.
Kawei ka dukan hakhmat ka Meghalaya Cooperative Apex Bank ka la kylla dpei katba ka ATM jong katei ka Bank ka la lait salit na ka jingkem ding.