Nongkhlaw: Ka Hima Hima ka la don 500 snem haduh mynta u snem, bad 195 snem mynshwa, ka la sakhi ia ka jingshah hiar thma ha ka sorkar Bilat, ha kaba u Syiem Tirot Sing Syiemlieh.
Ha kane ka 17 tarik Naitung 2024, ka Hima kan sa plie noh ia ka jaka pyllang spah hyndai ne ka Museum kaba la ai kyrteng kum ka “Museum Cum Cultural Centre for Indigenous knowledge” bad la bei pisa ka tnad Tribal Affair ka sorkar pdeng ha ka jinglut kumba T.2.5 klur.
Ia kane ka Museum la shna ha kyntoit ka shnong Nongkhlaw kaba khot ka Pamajong, kaba hap ha ka Eastern West Khasi Hills District.
Kaba kham kongsan ba ki paidbah kin sakhi ha kane ka Museum ka dei ia ki san tylli eiei ki waitlam kiba u Syiem Tirot Sing u la pyndonkam ban mait ia ki shipai Bilat ha ka jingiakhun thma jong u, kaba neh haduh saw snem eiei naduh 1829 haduh 1833.
La sakhi ba ka jingshna ia kane ka ïingpynsah nam ia u Syiem ka Hima Nongkhlaw, ka dang iaid shakhmat ban pynthikna ban pyndep ia ka jingtrei shuwa ban wan plie u bah Paul Lyngdoh myntri ba dei peit ia ka riti dustur ka sorkar jylla.
U Syiem jong ka Hima Nongkhlaw u Pa ’yiem Phrester Manik Syiemlieh ula iathuh ba kane ka jaka kan long kum ka jaka ban buh ia ki jingpynsah nam ia u Syiem Tirot Sing ha kaba don ruh ka jaka jngohkai ha syndah kane ka museum, kaban khring ia ki briew bad ban leh ia ka jingwad bniah.
La iathuh ba u Tirot Sing ula mih na krem kaba don hajan Zero Point da ka jingmut shisur hadien ba ka sorkar Bilat ka la khot ia u ban iakren iasuk, hynrei ka la shet shukor plak bad kem pynban ia u bad rah sha Decca ka Bengal ha kato ka por bad mynta ka dei ka Dhaka jong ri Bangladesh.
La iathuh ba ka don ka dak ka shin ba u Tirot Sing u sah ha kawei ka jaka ha Nongkhlaw bad haduh u snem 1950, u don u rishot ïing jongu ha kaba la pynieng ruh ia u mot jong u, Khasi Patriotic Home hynrei la don ba la rah noh ia une u rishot sha Museum Kolkatta.
5 tylli ki waitlam ba mait u tirot sing ia ki shipai bilat, dap 500 snem ka Nongkhlaw
