SHILLONG: Hadien ar snem ba la pyllait ia ki samla pule ka Jylla na ka jingiakhun ia ka examin Common University Entrance Test (CUET), mynta ka sngi ka 15 tarik Jymmang la pynlong ia kane ka exam na ka bynta ki samla kiba thmu ban pule ha ki kyrdan ba kham shalor ha ki Skulbah kylleng ka ri India.
Ka jingpyniakhun ia kane ka exam hapoh ka Jylla la pynlong ha ki 26 tylli ki Centre ba la buh da ka National Testing Authority (NTA). Kine ki Centre ki long 12 tylli ha Nongbah Shillong, 5 tylli ha Jowai bad 9 tylli ha Tura.
Ki don haduh 18,422 ngut ki samla pule kiba la thep kyrteng ban iakhun ia ka CUET, bad na kine 8535 ngut ki iakhun ha ki Centre ha Shillong, 4269 ngut ha Jowai bad 5618 ngut ha Tura. Bad ia ka result la buh ban pynbna ha ka 30 tarik Jylliew.
Ia kane ka exam CUET la pynlong da ka Online bad Offline mode-Computer Based Test (CBT) bad kumjuh da kaba shu thoh. Ia kane ka exam kaba la pynlong mynta ka sngi yn pynlong biang ha ka 18 tarik mynta u bnai kaba dei da ka offline mode, katba ia ka online mode la buh ban pynlong ha ka 21, 22 bad 24 tarik Jymmang.
Lah ban pynpaw ba ha ki arsnem bala dep, ka NTA ka khlem pynlong satia ia kane ka exam ha Meghalaya hadien ka jingud bad jingkyrpad jong ki samla pule bad ki kynhun seng, bad na ka liang ka Sorkar Jylla lyngba u Myntri Rangbah u la thoh sha ka NTA bad sha ka Sorkar Pdeng ban kyrpad pyllait ia ka exam CUET na ka Jylla.
Ha kawei ka liang, Ki samla pule kiba iakhun ia ka exam Common University Entrance Test (CUET) ha NEHU Centre, kila hap ban ap da ki bun kynta ban ioh thoh ia ka examin jong ka sobjek English, bad la iathuh ba ka rukom pyniaid ia kane ka exam ka la long kaba la shu leh thurmur.
Ki samla pule kiba dei thoh ia kane ka eksam ha ryngkat ki Kmie Kpa kiba leit synran, kila sah ha ka umdum halor ka rukom pyniaid jong ki bor khmih ia kane ka eksam ha NEHU Centre, namar kam shym la lah ban pynlong ha ka por ba la buh bad ka long ruh kaba kulmar thlim naduh ka por mynstep, ha kaba la don ka jingiakhynniat ban peit ia ki roll number.
Namar kane ka jingthurmur ban pynlong ia kane ka exam, ki Kmie ki Kpa bad ki samla pule ki la pan jingshai na ki nongpyniaid, namar kane ka jingleh ka lah ban ktah ia ka lawei jong ki Khun ki Kti ba kin ioh bteng ia ki jingpule lane ioh rung College.
Haba pyrshang ban iakren bad ki katto katne ki samla kiba iakhun ia ka exam ki la ong ba ia ka exam ba ki dei ban thoh ha ka por 3 baje ki dang ioh ban thoh haduh ka por 5 baje tam eiei, bad ki khynnah kiba dei ban thoh ia ka General Test ha ka por 5 baje ki dang ioh ban rung ha ki kamra klas haduh ka por 7 shiteng eiei mynta janmiet.
Uwei u longkpa uba la wan wad ia la u khun sha katei ka jaka leh examin, u la ong ba la dei ban pynkhreh ha ka rukom kaba dei haba pynlong ia ka exam, namar naduh 1 baje u la mih ban thoh exam hynrei haduh da dum um pat shym la poi ing satia.
Uwei u rangbah uba dei u nonghikai ha NEHU, u la ong ba ka jingpynkhreh jong ka NTA kam shym la long kumba la thmu, bad lehse namar ba kadei ka sien kaba nyngkong ia ka NEHU ban pynlong ia kane ka examin ka la mih ka jingduna. U la ong ba ka Sorkar kadei ban shim ia ka rai ban pynlong compulsory ne em ban thoh ia ka CUET.
Haba iakren bad u Registrar ka NEHU, u Retd. Col. Omkar Singh u la ong ba ka jingslem ban pynlong ia ka examin kadei namar ka jingbym treikam ki Biometric system, ha kaba hap ban pynlong ia ka exam khlem da leh shuh ia ka Biometric hadien ba la ioh jingbit na ka NTA.
Haba kylli, na ka liang u registrar u la kyntait ban ong ba ka NEHU kam shym la long kaba pynkhreh da kaba ong b aka NEHU kam dei kaba pynlong ia kane ka exam, hynrei la pyniaid beit da ka NTA bad ia ki kot jingkylli bad kiwei ki pynkhreh ruh la leh da ka NTA.