SHILLONG: U myntri rangbah ka jylla u Conrad K Sangma mynta ka sngi, u la maitphang ia ki mat bad ki lynti iaid jong ka jylla ha kine ki san snem ban wan ban pynpoi ia ka jylla sha ka ioh ka kot sha ka 10 billion dollar ha ka jylla.
Lyngba ka Invest Meghalaya Authority jong ka Meghalaya Industrial and Investment Promotion Policy 2024, yn khring ia ki nongseng kam nabar bad kumjuh na kane ka jylla. Shi bynta na kane, ka sorkar ka la iasoi soskular bad ka kompeni Pepsi ba kan bei T.180 klur ha Mendipathar ha ka jingheh ka jaka kaba 25 akar, bad la iasoi ruh bad ka North East United Football Club ban buh ia ka skul kynjatbol ha Mawkhanu, bad nalor kiwei.
Katkum ka jingong u myntri rangbah, 90 percent ki kam bym donkam ia ka jingtbit ne unskill job, kan dei beit tang ia ki trai shnong.
Haba kren sha ki lad pathai khubor mynta ka sngi, u Conrad ula ong ba khnang ban poi sha kane ka ioh ka kot kaba la buh thong, ka jylla ka la khein antad ba ka donkam 1 billion dollar ka jingbei pisa na ki kompeni ryngkat ki buskit ba ka sorkar kan ai sha kiba wan ban seng kam ha ka jylla.
U la ong ba na bynta kane, ka sorkar jylla ka donkam ban theh kumba T. 700 klur sha ki kompeni ha kine ki shi phew snem ban wan ha kam karkhana. Kine ki jingai buskit kin long kum ka bai seng, jingmab sut, ka jingmab SGST bad kiwei ki lynti ban pynjem bad ban pynsuk ia kiba seng kam seng jam.
Ki jait kam ki long ha ka tnad bording, ha ka tnad Information Technology, ha ka kam jngohkai, ka kam rep, Food Processing, kam ialehkai, lariti, nalor kiwei pat.
U myntri rangbah ula ong ba la khmih lynti ban poi sha kane ka thong ha ka san snem ban wan, la iasoi ia ka MoU ne ka jingiateh bad ki kompeni ha ki tnad bapher bapher. U la iathuh ba kumba T.2957 klur ha ki 9 tylli MoU la dep iasoi halor ka kam jngohkai, Food Processing, IT, Beverages hadien ba la pyntreikam ia ka Industrial Policy ba thymmai bad yn sa iasoi shuh ha kine ki sngi bad kiwei kiwei.
Khnang ban pynsuk ia kiba wan seng kam ha kane ka jylla, kan iapynbeit ruh bad ki Autonomous District Council khnang ba ym don ka jingeh bad jyrwit jyrwat.
Da ka Invest Meghalaya yn wan ka kompeni Pepsi ban bei T.180 klur ha Mendipathar
