SHILLONG: U myntri ka tnad ialehkai ka jylla u bah Shakliar Warjri ula pyntip hapoh ka iing dorbar mynta ka sngi ba la sam da ki snack sha ki nongialehkai ka Meghalaya Games tang ha I por ba wan ka President ka ri.
Ka Meghalaya Games ka la long ha Tura mynshem bnai Kyllalyngkot 2024.
Haba jubab ia ka jingkylli ba la wanrah u MLA ka Nongkrem u bah Ardent M Basaiawmoit ba la don ka jingai bam da ki snack ia ki nongialehkai, u bah Shakliar ula ong ba ka jingpynsaphriang ha social media kam dei kaba shisha bad la shu pynheh iew.
“Ngi ai snack ia ki nongialehkai tang ha ka por ba wan ka President hynrei shwa ia kata, la ai da ka jingbam kaba biang”, la ong u bah Shakliar.
U la ong ba katkum ka kyndon, hap ban bud haba wan ki heh sorkar kum ka President ka ri.