SHILLONG:U MLA ka Mawkyrwat u bah Renikton L Tongkhar mynta ka sngi ula wanrah ia ka mat hapoh ka ing dorbar thawain halor ka jingpynslem ki district selection committee ban khot pyllong ia ka eksamin thungkam.
Haba wanrah ia kane, u bah Renikton ula ong ba ki ophisar ki ai daw ba slem ban pyllong ia ka DSC examin dei namar ba don ka Roster system. U la ong ba baroh ki tnad sorkar kila hap ban buh ia ka bui Roster Register bad kin phah sha ka Directorate ban phah sha ka sorkar jylla. Kane kala bam por bad ka pynduh lad ia ki samla bad baroh ki tnad ki leh ia kane bad ka jingslem kam long shuh kaba kai namar tang ban iaid ka file na uwei u ophisar sha uwei ka shim por bun.
Ka don ruh ka jingkulmar ki ophisar ha ki district halor ka Roster system, kaba 80 percent ia ki Khasi-Jaintia bad Garo ha ki district.
U la ong ba katkum ka OM kaba pynmih ha u jylliew 2023, kala batai ia ka jingpynrung kam ia ki Khasi-Jaintia bad Garo kaba long 80 percent, hynrei kane kala wanrah jingkulmar namar ba don ki district ba duna ki Khasi bad don kiba duna Garo bad ula ai jingmut ba ka la donkam ban pynbeit shwa ba kan nang rben.
Ha kajuh ka por ula ai jingmut ba ka jingmang bhah kam 80 percent, dei ban bteng ia ki Khasi-Jaintia bad Garo, bad dei ban pynkylla noh ia ka Office Memorandum ban ailad ia ki DSC ban shim jingkhein ia baroh ki tnad sorkar ba lait kam ha jaka ban iaid sha personal department.
Pynkulmar ka Roster System ia ki ophisar ha ki District ban khot thungkam: Renikton
