SHILLONG: U myntri rangbah barim ka jylla uba dei u nongialam ka TMC u Dr. Mukul Sangma mynta ka sngi, u la buh jingkylli ia ka sorkar jylla, halor ka jingbujli ia ki briew ha ka Lokayukta.
Dang shen, ka sorkar jylla ka la weng noh ia lai ngut ki ophisar na ka Lokayukta halor ka nongrim ba ka ain kam shah ban thung ia kiba la shongthait bad kane ka la pyllong ia ka seng Voice of the People Party (VPP) ban pyrshah haduh ban mih sha madan ban pynbor ia ka sorkar ban pynneh ia kine ki ophisar.
Haba kren sha ki lad pathai khubor, u Dr. Mukul u la ong ba kaba kongsan ka dei ka jingthmu. Hato ka don ka jingmut sniew, hato ka don ka daw kaba pyllong i aka sorkar jylla ban bujli ia ki briew ha ka Lokayukta. U la ong ba ka Lokayukta ka leh ia ka kamram ban long ka kynroh ban khang lad ia ki kam bamsap. U la ong ba ka jylla ka khmih lynti ba ka jingwanrah ia ka Lokayukta ka long ban pyntieng ban pynshitom ia ki kam bamsap ha ki tnad sorkar.
U la ong ba dei ban ailad ia ka Lokayukta ba kan treikam pura katkum ka bor jongka khlem kano kano ka jingtuklar ne wohkjat noh ia ka, namar ba lada kam lah ban treikam katkum ki kyndon, mano pat ban tieng ia ka ain.
Hato donkam ia ka sorkar ban bujli ia ki briew ha Lokayukta: Kylli u Dr. Mukul
