SHILLONG: Ka Khasi Students Union (KSU) South West Khasi Hills mynta ka sngi ka la buh ïa ka jingdawa na u Symbud Myntri Rangbah ka jylla u Bah Prestone Tynsong uba bat ruh ia ka tnat kam poh ïing ba ka sorkar jylla ka dei ban buh da ki pulit ka sorkar jylla ban talasi ïa ki kam khaïi tuh sha Bangladesh namar ka jingtalasi da ki shipai Border Security Force (BSF) ka buh jingeh wat ïa ki nongkhaïi kiba dei hok ha ki thaiñ ba don ha khappud ka India bad Bangladesh.
Ha ka jingïakren bad ki lad pathai khubor u President ka KSU South West Khasi Hills u Bah Forwardman Nongrem u la ïathuh ba namar ka jingtalasi da ki BSF wat haduh ki jaka ba la jngai na khappud ka pynlong ïa ki ban shu pharep nongkhaii tuh lut wat ïa ki nongkhaïi kiba dei hok kiba don ki vendors card ban bat ruh ïa ki mar ki mata ba mut rah sha ki iew khappud.
U la ong ka jingshah bat ba dang shen ki kali kit mar kiba mut ban pynpoi sha ki lai tylli ki iew khappud kata ka haat Ryngku, ka haat Dangarbad ka haat, Nolikata ka dei kaba kum ka seng kam la pdiang.
U la ïathuh ba ha ka jingiakynduh bad u Bah Prestone ka seng ka la buh ïa ka jingdawa ba ka sorkar kan buh da ka coordination committee hapdeng ki BSF, ki pulit, ki nongïalam shnong bad khnang ba ka jingtalasi kan ym buh jingeh ïa ki nongkhaïi ba dei hok.