SHILLONG: Ka United Democratic Party (UDP) ka pynrem jur halor ka jingleh donbor jong ki shipai BSF ia u ophisar jong ka Sorkar Meghalaya, uba trei ha ka tnat Veterinary bad Animal Husbandry Department, Muktapur kaba hap ha ka Block Amlarem ha ka 11 tarik Rymphang 2024.
Hadien ka jingsaphriang ka khubor ba la mih ha social media , u ophisar u la shah leh donbor, shah tohkit bad la phah ia u ban law ia ki jain phong. Shuh shuh ki shipai BSF ki la byrgnem ban siat ia u ha Zero Point kaba dei ha khappud jong ka Ri India bad Bangladesh. Kane ka jingleh jong ki shipai BSF kiba dei ban iada bad ai ia ka jingshngain ia ki briew kiba sah ha ki thain khappud, ka la buh ia kane ka kynhun ha ka jinglehrain.
Kane ka jingleh khlemakor jong ki shipai BSF ka long kaei kaei kaba ym lah ban pdiang satia. Ka UDP kan ym shim sting ia kane ka kam bad kan thoh sha u Director General BSF bad ka BSF Vigilance Department ban tohkit halor kane ka jingjia ban ruh ban pynshitom ia kito kiba donkti kiba leh donbor bad pynmynrain ia kat u ophisar jong ka tnat sorkar jong ka jylla. Ha ka jingshisha, kum kine ki jingjia la dei ban kiar khnang ba kiba shong ba sah ha ki thain khappud kin don ka jingsngew shngain, la ong ka kyrwoh na u General Secretary ka UDP u Dr. Jemino Mawthoh.
Pynrem jur ka UDP ia ka jingshah thombor u doktor ha ki BSF
