SHILLONG: U nongialam ka NPP bah Hamletson Dohling u la ong ba, ban shu kynnoh bamsap iano iano ka long kaba suk hynrei khlem ki jingshisha ka long kum ka jingthok bad ialam bakla ia ki paidbah.
Haba kren ha ka jingialang ka NPP Block Umsning ha Lad Sharai mynta ka 31 tarik Kyllalyngkot 2024, u bah Hamlet u la pynphai nia ia ka jingkynnoh ka Voice of the People Party VPP ba kane ka sorkar ka dei kaba bamsap, bad u la ong ba lada ki lap shisha ba ka don ka jingbamsap, dei ban ujor da ka ejahar lane da ka mukotduma ha Kashari, ym ban shu kynnoh khlem Nongrim. Ka NPP kam kwah ban pynshit ban pyntieng hynrei ka kren beit ia ka hok bad ka jingshisha sha u paidbah. U la ong ba ki don kiba pyntieng pynshit ia ki paidbah ba ka jaitbynriew ka la don ha tmier riat bad u la buh jingkylli haei kata ka riat bad u la ong ba ka NPP kan ieng ba ka jaitbynriew kan ym poi shariat.
Ha kajuh ka por, u la ong ba dei ha ka sorkar kaba ialam ka NPP ba ka ktien Khasi, ka Inner Line Permit kila poi sha ophis ka sorkar pdeng ha Delhi, hynrei baroh shi katta la shu mih tang ha ki lad pathai khubor.
Lada lap ba bamsap, ujor ejahar ne ai mukotduma, ong u bah Hamletson ia ka jingkynnoh ka VPP
