SHILLONG: U nongialam ka Indian National Congress u Rahul Gandhi u la ong ba ka sohtrun kaba u ioh bam mynta ka sngi na iwei I longkmie ba die bad la I khun ha Ri-Bhoi ka dei kaba bang tam bad kaba thiang haduh katta katta. Kane ka jinglap jong ka long kaba pynsah kynmaw ia u ha ka jingim jong u hadien ba u la ioh mad ia ka sohtrun.
U Rahul u la ong ba u la phun ia la ka kmie ruh ban wanrah ia u sohtrun uba thiang tam na Meghalaya. Ula buh jingkylli pat, balei ym lah ban die ia une u sohtrun sha London, sha ki bynta bapher bapher ka pyrthei bad kane ka dei namar ba kam don ka lad ban phah ia kine ki sohtrun hynrei ki paidbah ka Meghalaya kin riew spah lada ka plie ka lad bad u la kular ban thaw lad ban kyntiew ia ki mar rep ka jylla.
U la ong ia kane haba kren ha ka jingialang paidbah ha Pahamsyiem, Ri-bhoi ha ka jingwan iaid Bharat Nyay Joda Yatra shi bynta ban kyrsiew ia ki paidbah ban ialeh pyrshah ia ka sorkar BJP.
Ryngkat ka jingsynran lang ki nongialam ka Congress naduh u MP bah Vincent H Pala, bad kiwei, u Rahul Gandhi ula iaid da ka bos bad hiar ban iaid kjat ban ai khublei ia ki paidbah kiba la ap lain shait linter ka surok.
U la iaid 4000 km haduh mynta kaba sdang na jylla Manipur ban iakynduh ia ki nongrep, ki samla, ki nongbylla kylleng ki jylla.
Ka sohtrun ba thiang tam ha pyrthei dei na Meghalaya, ong u Rahul
