SHILLONG: Ka kyrtong ka NPP na Shillong Parliamentary konstitwensi, ka kong Ampareen Lyngdoh ka la ong ba ka jingialap elekshon jongka, kam sangeh satia naduh ba ka la shah pynbna kum ka kyrtong.
Haba kren mynta ka 12 tarik Kyllalyngkot 2024, ka kong Ampareen ka la ong ba kam donkam ban ialap elekshon kaba kham khyllah hynrei ka kwah ban iakynduh ia ki paidbah ban sngewthuh ia ki jingeh jong ki paidbah.
Ka thong jongka, ka long ban leit tur sha baroh 36 tylli ki konstitwensi kiba hap ha Khasi-Jaintia Hills ban tip bha ia ki jaka.
Ki mat kiba kongsan ba ka angnud ban iasaid ka long ban pynkhlain ia ka lad jingsumar, ban kyntiew ia ka rep ka riang, ka lynti ka syngkieng, ban pynkhlain ia ki dorbar. Kiwei pat ka long ban iasaid ruh ia ka ktien Khasi ba kan rung ha ka khyrnit ba phra ka riti synshar ka ri, kumjuh ban pynkhlain ia ka Khyrnit ba Hynriew ka riti synshar.
Ka la ong ba lada ka shah jied kum ka MP, kan ym tieng ban kren da ka ktien Hindi ruh lada hap ban kren ha Parliament hynrei haba kiwei ki wan sha kane ka jylla, ki dei ban burom ia ktien jong ki briew kane ka jylla.
Ka jingialap elekshon ka iaid khlem sangeh naduh ba pynbna kum ka kyrtong, ong ka kong Ampareen
