SHILLONG: Ka Voice of the People Party (VPP) ka la ong ba lada ka jingiakren iasuk bad ka ANVC ka iaid beit balei ka sorkar kam lah ban shimkhia ban pynbeit da kajuh ka rukom ban iakren iasuk bad ka Hynniewtrep National Liberation Council (HNLC).
Lah ban kdew ba ka HNLC dang shen ka la pynbna ba ka la weng noh ia ka jingiakren iasuk hadien ba ka la kam ba ka sorkar kam shym la ai ia ki jingdawa jong ka ban map ia baroh khoit ki kam mukotduma jong ki dkhot kiba donkti ha ki kam beain.
Ha ka jingiakren bad u bah Batskhem Myrboh u Nongaiktien ka VPP, u la ong ba kane kam dei ka sien ba nyngkong ba ka sorkar kan iakren iasuk bad ki seng beain ha ka jylla hynrei ka la dei ka sien kaba ar.
U la ong ba sorkar kumba ka iakren iasuk bad ka seng ANVC ka dei ban pyndonkam da ujuh u dieng thew tarajur ha ka jingiakren iasuk bad ka HNLC ruh.
“ Kumba ki pyndonkam ia ka rukom iakren iasuk bad kiwei ki seng lehnoh ha thain lammihngi, kadei ban leh ia kajuh ka rukom bad ka dei ban pyndonkam da ujuh u dieng thew tarajur ha ka jingiakren iasuk bad ka HNLC,” ong u bah Batskhem.
U Nongaiktien ka VPP u la ong ba ka jingbym iaid beit ka jingiakren iasuk bad ka seng HNLC kadei namar ba ka jingbym don ka jingshimkhia jong ka sorkar. “ Naduh nyngkong hi ngi iohi ba ka jingiakren kam da dei eh ba ka mih na ka sorkar jylla hynrei ka mih na ka HNLC. Ka sorkar jylla kam da shikmkhia ia ka HNLC bad ka long ka bym sngewtynnad lada kane ka jingiakren iasuk ka shu kut noh,” u la ong.
U la ong ba ka VPP ka kwah ba kane ka seng beain kan kut noh ha ka jylla bad ki kwah ba ka sorkar jylla, ka sorkar India bad ka HNLC kin iakren iapynbeit bha.
La bynrap ruh ba ka sorkar jylla kam da dei ban leh mutlop eh bad kidei peit bha ia ki mat bad ki jingdawa jong ka HNLC.
“ Ngi donkam ia ka seng ba kan kut noh bad ha ka jylla ngi donkam ia ka jingsuk ba kan roi kan par bad lada ym don ka jingakren iasuk bad ka mih kano kano ka jingeh hadien kam long kaba sngewtynnad ia ki nongshong shnong ka jylla namarkata donkam ban wanrah ia ka jingiakren iasuk kaba don jingmut,” ong u Nongaiktien ka VPP.
Na ka liang ka VPP ka la kyntu ia ka sorkar jylla ba kadei ban shim khia ia ka jingiakren iasuk bad ka HNLC.