400 ngut ki MP, buh thong ka BJP ban jop ha ka elekshon MP 2024

SHILLONG: Ka BJP kala buh thong ban jop 400 ngut na ka 543 ngut ka jingdon ki dkhot ka ïing sha ka Lok Sabha ha ka elekshon mynta u snem 2024.
U nongialam ka BJP uba peit ia ka Meghalaya, u Dr. Chuba Ao, mynta ka 4 tarik Kyllalyngkot 2024, ula ong ba ka Meghalaya ruh kan iakhun tyngeh ban jop ha kane ka elekshon ban wan.
U Chuba ula ong ba ka jingbym lah ka BJP ban jop bun ki MLA ha ka elekshon kaba la dep, ka dei namar ba ka tlot ban pynkhlain ia ka party sha ki tynrai.
Ula ong ba ka party shi bynta ban pynkhreh ia ka elekshon, kala bthah ia baroh ki nongkitkam, ki dkhot ban leit pynshai pynsngewthuh ia ki skhim ba ka sorkar BJP kala ai sha ki paidbah kum ka skhim ing baduk, ka lyer shet, ka bording, ka um bam bad kiwei khnang ba kin ai ia ka jingkyrshan.