SHILLONG: Ka KSU Laban Circle ha ka 3 tarik u Kyllalyngkot, 2024 ka la phah dorkhas sha u Chief Executive Officer ka Shillong Municipal Board halor ka jingkyndang ka Seng ia ka shelter home ha Kenches Trace hadien ba la paw pyrthei ki video ha social media halor ki jingdih drugs ki kynthei bad shynrang ha katei ka jaka bad ha kajuh ka por ba katei ka jaka ka la kylla ka ktem drugs bad ki kam leh awria.
Ka Seng ha ka dorkhas ka jong ka, ka la pynpaw ba dei na ka liang Shillong Municipal Board ba kam shim la lah ban peit bniah bad jurip na ka por sha ka por ba kane ka jaka ka la kylla ka ktem ki nongbuaid, nongdih drugs bad ban haduh ban kylla la jaka die met. Ka Seng ka la dawa ban dei ban buh noh ki nongap pahara (Security Gaurd) ha kane ka jaka ha ryngkat ki nongpeit nongkhmih (caretaker) ban lait na ka jingrung jingmih laitlan. Ka Seng ka la maham ruh ba ym bit ban pynkylla ia kane ka jaka kum ka ktem ban iadih kyiad bad bad leh kam awria.
Ka Seng ka la ban jur ruh ba ki don katto katne ki briew kiba sah ha ka Shelter Home kaba dei ka jaka na bynta ki briew ki bym don iing don sem bad ki bym kot bor ha ka kamai kajih, hynrei don pat ki briew kiba don la ka kali kamai, ka kam ka jam hynrei ki sah ha kine ki jaka namar ba ki ioh ei lut nadong shadong haduh ka bam ka dih. Kane pat kan pynduh jaka ia kito kiba donkam hok ia kum kine ki shelter home. Ka Seng ka la dawa ba ia kum kita ki briew dei ban pynmih mardor bad dei ban don ki kyndon kiba biang ba ia kum kino ki jait briew ba lah ban pynrung ha kine ki Shelter Home bad ym dei ba kin lah ban sah shyrta hynrei dei ban buh da ka por ba ynda kila biang ka kamai ba kin hap ban mih na katei ka jaka.
Ka Seng ka la pynsngew ruh ba ka Dorbar Shnong K.O.R kam shim la ai jingmynjur ban don kane ka Shelter Home bad kane ka lah mih ha ka por COVID kum ka Temporary Shelter Centre hynrei mynta pat ka la kylla da kumwei. Bad ka jingbymlah ki bor pyniaid ban tehlakam ia ki briew ba wansah ha katei ka jaka ka buh jingma ia ki nongshong shnong jong ka thain K.O.R bad Laban ruh kumjuh.Kane ka dei ka kyrwoh na u Franky Rani u ublicity Secretary KSU Laban Circle.