SHILLONG: Ka sain pyrthei ha KHADC ka kylla syndet hadien ba u bah Bindo M Lanong bad u bah Lambor Malngiang kiba dei ki MDC ka UDP kila leit ai jingkyrshan noh ia ka Executive Committee ka Khasi Hills Democratic Front (KHDF) hapoh ka jingialam u bah Pyniaid Sing Syiem kum u CEM na ka NPP.
La pdiang burom ia ki da u CEM bah Pyniaid Sing Syiem, u Dy. CEM bah Pynshngain N Syiem nalor kiwei ki Executive Members.
Ka KHDF ka dei ka shatri kaba la thaw lang ka NPP bad ka Congress ha KHADC hadien ba la pynkhyllem noh ia ka Executive Committee kaba ialam ka UDP saw bnai mynshwa.
Mynta ka jingdon briew ka KHDF ha KHADC ka la kot sha ka 18 ngut ha ka iing dorbar kaba 30 ngut ki dkhot.
Haba kren sha ki lad pathai khubor, u bah Pyniaid u la ong ba ka KHDF ka la pdiang burom ia ki kum ki riew shimet, ym kum ka party bad u la ong ba ka jingdon lang jongki ha kane ka EC, kan pynkhlain shuh shuh ia ka EC na bynta ka jingbit jingbiang ka Council bad ka jaitbynriew.
Leit kyrshan NPP ar ngut ki MDC ka UDP
