SHILLONG: Ka tamasa mawbynna ne ka Monolith Festival kaba la pynkhreh ban pynlong mynta u bnai Nohprah, la pynkynriah noh sha u bnai Kyllalyngkot u snem ban wan namar bym pat dep ban ia ki jingpynkhreh pynkhrum.
Haba kren mynta ka sngi, u Executive Member ka tnad Lariti ka KHADC u bah Victor Ranee u la iathuh ba ka Council ka la hap ban pynkynriah namar ba ha une u bnai ki don bun ki tamasa khamtam ka jingpynkhreh jong ki paidbah ia ka Khristmas. Ia ka Tarik yn sa pynbna shen halor kane.
Ka tamasa ka lah ban long ha ka taiew ba nyngkong ne baar jong u Kyllalyngkot”, la ong u EM.
U la ong ba ha kane ka tamasa yn ym shah ban die ia ki mar ki tiar kiba wanrah nabar hynrei yn shah tang ia kiba dei na kane ka jaka naduh ki jingbam jingdih. Ia ka kyiad phareng kynthup ka beer ruh yn ym shah ban die ha kane ka sngi lait noh tang ia ki ‘yiad um Khasi.
“Ha kane ka tamasa yn ym shah ban wanrah ne die kyiad phareng, beer hynrei yn shah tang ia kiba ki yiad um kiba shna bad pynmih na kane ka jaka, ki umsoh bad kiwei ki tiar”, la ong u E<.
Lah ban kdew ba ia kane ka tamasa, ka KHADC ka la aiti ha ka tnad jngohkai ka sorkar jylla ban pynbit pynbiang naduh ka jinglut jingsep kaban neh lai sngi.
U EM u la ong ba ka Council ka la pynkhreh ruh ban pynlong ia ka heritage village kum ka jaka ban khring ia ki briew nongwankai ynda la dep ka tamasa mawbynna khnang ba kan pynmih pisa ia ka Council, ym ban shu ieh shrah tang shu dep ka tamasa, kumba la jia ha kine ki snem ba la leit.
Katkum ka jingiateh, ka KHADC kan ioh 60 percent bad ka Hima Mawphlang kan ioh 40 percent na ka jingmih na katei ka heritage village.
Ba bun palat ki tamasa mynta u bnai, kynriah noh ia ka Monolith Festival sha u Kyllalyngkot
