SHILLONG: Ka kynhun ki nongialam ka Harijan Panchayat Committee na Them Iewmawlong ryngkat ki nongialam ka Gurudwara Management Committee, Delhi kila pynpaw ba watla ki don ki mat kiba ka sorkar jylla ka la pdiang ia ka jingpynsngew jongki, hynrei dang don ruh kiba ka sorkar kan sa bishar ha kine ki sngi.
Haba kren mynta ka sngi hadien ba la dep iakynduh bad ka sorkar, u Jagdip Singh uba wan na Gurudwara, Delhi u la ong ba ki don ki mat ki bym pat lah ban iashim rai, yn sa iakren biang ha ka jingialang kaban long ha u Kyllalyngkot ban wan. Hynrei ha kajuh ka por, ula ong ba ia ki mat ba la rai bad la iakren ym pat ban iathuh ia mynta watla u kubur ba ka jingialang ka long kaba seisoh.
“Kane ka dei ka jingialang kaba ar, ki don ki mat ba ngi la rah bad kila pdiang bad don ki bym pat lah ban rai ruh na baroh ar liang. Ngin iakren biang ha ka jingialang ban wan kaban long ha u Kyllalyngkot”, la ong u Jagdip.
Hynrei u la kyntait ban iathuh eiei ia ki mat ba la iakren namar ba u ong ba kin sa iakren biang ha ka jingialang kynthup ia ka jingpynkynriah ia ka Gurudwara kaba la tei ha Them Iewmawlong.
Katba u Secretary ka Harijan Panchayat Committee u Gurjit Singh u la ong ba kin iakren bad iamir jingmut bad ki nongshong shnong baroh ia kane ka jingiakren bad ka sorkar. U la pynpaw ba ka jingialang ka long kaba sngew tynnad.
Sngew hun ki Harijan ba pdiang ia ka sorkar ia ki jingdawa, dang don kiban iakren shuh
