SHILLONG: Hadien ka jingkynrandien noh jong u Dr DRL Nonglait ban iakhun ia ka election MP na ka seng United Democratic Party (UDP) ka jingkhang ka la plie war ia u nongialam barim ka HYC, u Bah Robertjune Kharjahrin uba long mynta uba hakhmat eh ban ioh ia ka ticket.
Watla kham hashwa bun tylli ki kyrteng kiba la paw napdeng kiba pan ticket na ka UDP na ka bynta ka election Lok Sabha ka ban long ha u snem ban wan, hynrei katkum ka tyllong khubor ba la ioh la iathuh ba ka kyrteng kaba paw bha mynta kadei ka jong u Bah Robertjune. Kane ka jingpaw bha shakhmat jong u Bah Robert ka long ruh hadien ba u MLA barim ka Mawlai uba dei u vice president ka UDP um da don jingmut than ban iakhun lane iaknie ia ka ticket na ka bynta ka election MP.
Ka khubor ka iathuh ruh ba jan baroh ki nongialam ka seng UDP ki mynjur ban ai ia ka ticket sha u Bah Robert, hynrei ki dang ap pat sa ia ka rai jong ka HSPDP kaba don lang ha ka synrop Regional Democratic Alliance (RDA), bad la ioh jingtip ruh ba ha ka taiew ban wan kan don ka jingiakynduh jong ki ar seng ha ka RDA bad hadien kata kin sa pynbna syndon ia u kyrtong.
Ka election ban jied ia ki Member of Parliament sha Lok Sabha kan long ha u bnai Jymmang jong u snem ban wan, hynrei ka jingpynkhreh ia kane ka election ha kane ka Jylla ruh ka la sdang shongshit bha. Ki don ruh ki seng sainpyrthei kiba la dep pynbna ia ki kyrtong kum ka seng VPP kaba la pynbna ban sei da u Dr Ricky AJ Syngkon, ka NPP ka la pynbna ban sei da ka longkmie kaba dei ka Myntri, ka Dr M Amapareen Lyngdoh.
Hap iaknieh tiket u bah Robertjune bad u bah Process na UDP
