SHILLONG: Ka Dorbar shnong Mawpat ka la shim ia ka sienjam bad ka la buh ruh da ki kyndon ba tyngeh ia ki longing jong ki nongkhaii drok khnang ban lah ban tehlakam ia ka jingpur sted jong u drok ha kane ka shnong bad ka jylla baroh kawei.
U Rangbah shnong ka Mawpat u bah Juda Wahlang, u la iathuh ba ka shnong ka la shim ia ka sienjam ba tyngeh ha kaba ka ju pynduh lut ia baroh ki jingmyntoi jong ka longing kiba khaii ia u drok.
U Rangbah shnong u bah Juda, u la ong ban tehlakam ia ka jingjur jong u drok ha kylleng ka jaka, ka shnong ka la rai ba nyngkong kan iakhun shwa ban lap ia ki nongshalan ne nongkhaii ia u drok.
La ong ba lyngba kane ka mawjam, ka shnong ka iohi ba ka don ka jingtreikam bad ka la wanrah ia ka jingpyrkhat ha kito ki longing ha kaba kin phikir la bynta ki jong ki khun bad ki longing longsem jong ki.
U Rangbah shnong ka Mawpat u la iathuh ruh ba haduh mynta ki don katto katne ki nongkhaii drok ba ki bor ka ain ki la ioh ban kem. Hynrei na ka liang ka shnong ka la rai ha ka Dorbar ba kin nym lah ban ioh jamin tad haduh ba ka shnong kan ai jingbit ban bah jamin.
Haba iadei bad ka ki nongdih kiba la kyrni ha u drok, na ka liang ka shnong ka ju ai ka jingsyllok bad ha kajuh ka por ka ju buh ka jingmaham lada ki sam paralok kin ngat lang ha kajuh ka kyndon bad ki nongkhaii drok.
Pynduh lut ka Mawpat ia ki jingmyntoi ia ki longïing ba don nongkhaïi drok
