SHILLONG: Ka Hynniewtrep Achik National Movement (HANM) ka la iohpdiang ia artylli ki shithi na ka tnad Kam Pohiing ka sorkar pdeng halor ki lai tylli ki mat jingdawa kiba ka seng ka la pynsngew sha sorkar pdeng.
Ka seng dang shen ka la leit sha Nongbah Delhi ban pynlong ia ka jingiakhih bad ka ladep ruh ban aiti ia ka dorkhas sha u Myntri Rangbahduh ka ri, ka President jong ka ri bad sha ka tnad kam pohiing ka sorkar pdeng halor lai tylli ki mat jingdawa kynthup ban pynrung ia ka ktien khasi ha ka khyrnit ba phra jong ka riti synshar ka ri India, ban pyntreikam ia ka Bengal Eastern Frontier Regulation Act, 1873 lane ka ILP kaba la pdiang ha iing Dorbar ha ka 19 tarik Nohprah, 2020 bad ka mat ka ba lai ka long ban thung ia ka Boundary Commission ka ban iarap ia ki ar tylli ki jylla kiba dang don mynta ka jingiakren pynbeit pud.
Haba kren sha ki lad pathai khubor ha ka 2 tarik Nohprah2023, u President Rangbah ka seng u bah Lamphrang Kharbani u la ong haba iadei bad ka ILP, ka sorkar pdeng kam shym la jubab shai ‘kam shym ong hoid ne em halor kane ka bynta’.
Katba haba iadie bad ka jingdawa ban thaw ia ka Boundary Commission, ka jubab na ka sorkar pdeng ka long ba ia kane ka bynta ka ladep phah ia ka jingthoh sha ka Central State Division kaba dei khmih ia ka jingpynbeit pud jong baroh ki jylla kiba hap hapoh ka dong shathie Lammihngi ka ri India.
Hooid ne em khlem ong eiei ka sorkar India halor ka jingdawa ILP
