SHILLONG: Ka kyrtong ka NPP na bynta ka elekshon sha ka Lok Sabha, ka kong Ampareen Lyngdoh mynta ka sngi kala ong ba lada ka shah jied kum ka MP na Shillong Parliamentary Constituency kan kit lut ia ki mat jong ka jaitbynriew ha Parliament, kiba sahteng ha kine ki phew snem ba la leit.
Ha ka jingkren sha ki lad pathai khubor mynta ka sngi hadien ba la pynbna kum ka kyrtong dang shen, ka kong Ampareen ka la ong ba ka don ka dawbah ba ka NPP ka dei ban jop ha kane ka elekshon MP ban sa wan bad kawei ka dei ka jingkamai bun vote tam ha ka elekshon MLA kaba dang shu dep.
Ka la ong ba kam kwah ban kynnoh iano iano ne ia u MP ba mynta u bah Vincent H Pala hynrei ka ieh ha ki paidbah ban bishar ia ki kam jong u MP.
Ka la ong ba kan iakhun MP khlem da niew ne shah shiliang iano iano lada ki dei na kano kano ka party ne ka niam hynrei kan kdup lut ia baroh da kaba buh ia ka jingsngew sharud.
Halor iano ban pyniakhun MLA lada jia ba ka jop ia ka MP hynrei ka la ong b aka khun jongka ruh ka la rangbah, kam don jingeh ba kan shimti ia ka lyngkor tangba ka shong haka rai jong ki paidbah bad ka party.
Halor ka jingshah kynthah ka NPP ha ki rynsan social media khamtam na ki nongkyrshan ka Voice of the People Party (VPP), ba kam dei satia ka rynsan ban rai ia ka sain pyrthei.
Halor ka kam mukotduma jongka, ka la ong ba lada ka social media ka hap ban rai ia ka sain pyrthei, ia ki kam mukotduma, ia ka riam ka beit jong ki kynthei bad ia ka jinglong ki rangbah, kan bha ban iakhun elekshon noh ha Social media hynrei, katba ka elekshon ka dang pyniaid ka election commission of India, hap ban rai da ka jingjied na ka jingleit thep ia ki vote ha jaka thep vote.
Ka kyrtong ka MP ka NPP na Shillong Parliamentary constituency, ka kong Ampareen Lyngdoh ka la ong ba kam mukotduma ka dang don ha ka jingbishar halor ka jingshah kynnoh jongka ha kaba iadei bad ka jyrsieh thungkam nonghikai ha ka tnad pule pule ha u snem 2009.