SHILLONG: Ka 24 tarik Naiwieng 2023, ka seng ki trai bad nongñiah trok ka Meghalaya Commercial Trucks Owners and Drivers Association kala ujor sha u Chief Executive Member ka KHADC u bah Pyniaid Sing Syiem pyrshah ka jingshah khrong pisa pathar ki trok ha ki khyrdop ka district council kiba mih pathar ha ki surokbah.
U President ka seng u bah Mostlandar Marngar ula ong ba ka jingmih ki khyrdop ka KHADC ka long pathar haduh bym ithuh ithaw shuh bad ka dor ruh ka iapher ha ka por myn sngi bad ha ka miet nalor bun ki bym ai ia ka rusit haduh ba kala mih ka jingiapyni bor ruh hapdeng ki nongñiah trok bad ki nongkhrong pisa.
U la iathuh ba u CEM ula kular ban peit ia kane hadien ba la ioh ia ka jingtip na ka sorkar jylla namar ba ka Council mynta ka dang ap ia ka working plan kaba la dep phah sha ka sorkar.
Ula ong ba ka seng kan ym treh ban siew pisa haduh ban ioh ia ka jingshai ban tip ia ki khyrdop kiba long aiñ.
Iapher ka dor khrong ki khyrdop ka KHADC myn sngi bad mynmiet, ong ki nongñiah trok
