SHILLONG: Myntri Rangbah ka jylla u Conrad Sangma, u la ong ba ka sorkar jylla haduh mynta kam pat rai ia ka tarik na bynta ban pynlong ia ka ilekshon MDC jong ka Khasi Hills Autonomous District Council (KHADC) bad Jaintia Hills Autonomous District Council (JHADC).
Haba kren mynta ka sngi sha ki lad pathai khubor hadien ba la wai ka jingialang jong ka kynhun Myntri Sorkar, u Conrad u la ong, “Ngin sa peit hadien ba ka tnad kaba dei khmih ka la pyntip sha ka sorkar, ngin sa shim ia ka rai ha kaba iadei bad ka tarik ban pynlong ia ka ilekshon.”
Haba iadei bad ka jingpynjlan ia ka ilekshon MDC, u Myntri Rangbah ula ong, “Haduh mynta kam pat don kano kano ka jingthoh ban poi sha nga bad dei tad ynda ka la poi ka jingthoh sha nga ne sha u Myntri uba khmih ia ka tnad District Council Affairs, ngin sa lah ban kren eiei”.
Ka elekshon MDC kan iaid beit kumba ju long, ong u Conrad
