SHILLONG: Namar ka jingkhapngiah ka sor Shillong, ka sorkar jylla kan shna da ka Skywalk na Barik Point sha Khyndailad khnang ban pynkylluid ia kane ka nongbah.
U myntri Rangbah ka jylla u Conrad Sangma haba kren sha ki lad pathai khubor, u la ong ha shwa ban shna ia ka Skywalk donkam ban pynkylluid shwa ia ki jingieng ki kali na surok. “ Hadien ba la pynkylluid ia ki surok yn sa iaid shakhmat ia ka jingtei ia ka skywalk,” u la bynrap.
La ong ruh ba shen hashwa ka Khristmas ne ha shwa u bnai Kyllalyngkot ne Rymphang, 2024, ka Nan Polok kan ioh ia ka jaka ieng kali kaba thymmai bad yn sa shna shuh shuh ia ki jaka ieng kali ha kylleng ki jaka.
U Myntri Rangbah u la ong “Katkum ka jingong ki pulit pyniaid kali ynda la sdang ka jingtei ia kane ka Skywalk kan sa don ka jingdheng kali kaba jur hangne ha nongbah na kata ka daw donkam ban pynkynriah shwa ia ki kali kiba ieng ha ki surok. Hadien ba ladep shna ia ka jaka set kali, ngin sa iaid shakhmat ban tei ia ka Skywalk.”
Ha kajuh ka por u la ong ban pynkylluid ia kane ka nongbah Shillong yn pynkynriah ia baroh ki ophis sorkar kiba don ha Shillong sha New Shillong, Mawdiangdiang.
“ Ngi khmih lynti ba ngin lah ban pynkynriah shwa ia ka Secretariat bad mynta ka kam ka la iaid shakhmat na bynta ban pynwandur bad kyrmen ba ha ki khyndiat bnai yn lah ban pynkhreh ia ka Design bad la buh thong ba ha une u snem mang tyngka yn sdang noh ia ka kam.
U Myntri Rangbah u la kyntu ruh ia ki kmie ki kpa ba kim dei ban pyndonkam ia ki kali shimet haba ki leit buh skul khun bad kumjuh ia ki nongtrei sorkar
Da ka jingkieng iaid kjat -skywalk na Khyndai Lad sha Barikk ban duna sahkut kali
