SHILLONG: U Myntri Rangbah ka Jylla Conrad K Sangma hynne ka sngi Balang, ula ong ba ka Jylla Meghalaya ka ioh um slap haduh 63 billion cubic liter ha ka shisnem hynrei, ka Sorkar ka lah ban pynlang tang 1 billion cubic liter na kane ka um slap.
Ka Meghalaya ka dei kawei na ki jaka ba jur bha u slap ha pyrthei bad na 63 billion cubic liter ka um manla u snem haduh 31 billion cubic liter ka la tuid ei sha Bangladesh bad 31 billion cubic liter kala tuid sha Assam.
U Conrad u la ong ia kane haba kren ha ka jingpyllait ia ka Meghalaya Water Smart Kid Campaign, ka sienjam bala shim lyngba ka Jal Jeevan Mission (JJM) ban pynsngewthuh ia ki khynnah halor ka jingkongsan ban pynlang/tyngkai ia ka um.
U Myntri Rangbah ula ong ba kum ka sienjam ha ka jingialeh ban tyngkai bad pynlang ia ka um, ka Sorkar Jylla kala shim ia kiba bun ki sienjam, kiba la kyrdan da ki jingbei pisa ba wan nabar (Externally aided project (EAP) bad ka Ministry of Jal Shakti ka Sorkar India.
U pyntip ba haduh 1000 tylli ki top um la shna ha kylleng ki jaka ka Jylla khnang ban lah pynlang ia ka um bad nang pyn bun ia ka um ha ka mei ramew lyngba ki project bapher bapher.
U Conrad u pyntip ba ka tnad Public Health Engineering kala ioh bun bah ka song pisa na ka JJM bad EAP, kaba la jan kot ia ka T.8000 klur.
Ha kajuh ka por, u Myntri Rangbah u pyntip ba hapoh ka JJM, ka Jylla kala ioh ia ka khusnam kum ka Jylla ba pyntreikam bha da ka Ministry ka Jal Shakri nalor ka jingioh ia ki song pisa. U pyntip ba ka Jylla kala pyndep palat 4 lak ki longiing ha ka jingpynioh kor um hapoh Iing bad hapoh u Lber 2024, ka thong ban pyndep ka long 6 lak ki longiing.
Tuid lut ka um na Meghalaya sha Assam bad Bangladesh
