Ngat 3 ngut ki Gang nonglute trok jhur na Mawlai Bypass

SHILLONG: Ki pulit East Khasi Hills ha ka 6 tarik u Naiwieng 2023, ki la kem ia 3 ngut ki gang kiba lute na ki nongñiah trok kit jhur.
Ha ka kyrwoh mynta ka sngi, u SP City bah Vivek Syiem ula ong ba kine ki nonglute ki pynbiej ia ki nongñiah trok ba kin die ia ki jhur ha ka dor kaba tad hynrei kin rahbor ia ki sha khlaw hajan ka ISBT Mawiong bad sa dawa pisa bad byrngem ba ki nongniah trok kin phone ia ki nongkhaïi ban ong ba ki la ioh ia ki jhur bad ban phah noh ia ka pisa da kaba siew lyngba ka Gpay sha kita ki runar kiba kam ba kidei ki nongdie jhur.
Ki pulit kila ioh kem ia kine ki gang nonglute da ka jingiatreilang ki nongkhaïi ba kynthup na ka Meghalaya Traders Fresh Vegetable & Ginger Association bad ka Khasi Jaintia Fresh Vegetable Suppliers Association.
La kem ia ki na Mawlai By Pass bad la ioh ban kurup ia kawei ka kali Maruti Swift Dzire ML 05 J 3466 bad 4 tylli ki mobile phone. Ki pulit ki dang pynlong ka jingthwet kaba jur ia kiwei pat ki runar.