SHILLONG: U president ka Hill State People’s Democratic Party (HSPDP), u Bah KP Pangniang u la ong ba ka jingmih noh u Bah Sandondor Ryntathiang na ka party ban leit pyniasoh noh sha ka Voice of the People Party (VPP) kam dei shuh kaba dang thymmai ban tip, namar naduh ka election ha Sohïong um don jingmut shuh ban iakhun.
U Bah Sandondor Ryntathiang uba bat kum u president ka Youth Wing jong ka HSPDP CEC, u la pynbna ba u la mih noh na ka party, bad ia ka shithi ieh noh kam ruh u la phah hynnin ka sngi ka 1 tarik Naiwieng sha u president ka HSPDP.
“Ka jingmih noh u bah Sandondor kam dei kaba thymmai namar ba naduh ka elekshon MLA na Sohiong, um don jingsngew tynnad ban tur sha madan ban iakhun na ka HSPDP. Hynrei ngi sngew tynnad ia ka jinglong jong u, namar ba u la wan hi sha nga kum u President, ban iathuh ba u la don ka jingthmu ban leit sha ka VPP”, la ong u bah Pangiang.
Katkum ka jingpyllait khubor u Bah Ryntathiang u la kren shai ba ka jingmih noh na ka HSPDP kam dei satia ba u don daw ia ka party lane ia ki nongialam, hynrei u don ka jingthmu ban pyniasoh noh sha ka VPP.
Haba kren mynta ka sngi halor katei ka jingieh kam jong u nongialam ki samla, u Bah Pangniang u la ong ba naduh kham hashwa la iohi ha ki lad pathai khubor ba u ju don ha ki jingialang jong ka seng VPP, bad ka party kam sngewpher shuh, hynrei u la kitbok ia u Bah Ryntathiang ba un trei bha haba u don ha kano kano ka party ruh.
Ha kajuh ka por u nongialam ka HSPDP u la ong ba kumba don kiba mih na ka party ban leit sha kawei pat, kumta ruh ki don kiwei ki nongialam na kiwei ki party ki ban sa pyniasoh sha ka HSPDP, hynrei u la kyntait pat ban iathuh ia ka kyrteng kita ki nongialam.
Mih uwei, wan sa kiwei, ong u President ka HSPDP ha Sohiong constituency
