SHILLONG: U symbud myntri rangbah ka jylla u bah Prestone Tynsong u la sangeh ia ka jingdawa artikil 371 jong u bah Ardent M Basaiawmoit ba kane ka dei ka jingma kaba shyrkhei ia ka jaitbynriew namar ba kan pynduh syndon ia ki district council.
Haba kren ha ka jingrakhe ia ka lyngkhuh sngi khlad u Rev. JJM Nichols Roy kaba la pyllong ka JJM Nichols Roy College ha Qualapatty ha ka 1 tarik Naiwieng 2023 ryngkat ka jingsnohkti lang bad ka KHADC, u bah Prestone u la ong ba ha kine ki khyndiat snem , tharai 10 snem mynshwa la don uwei u MLA uba wanrah ia ka mat (motion) hapoh ka ïing dorbar ban pynduh noh ia ka District Council ban wanrah pat da ka 371, kaba dei ka jingma kaba shyrkhei bha ia ka jaitbynriew.
Lah ban kdew ba u bah Ardent M Basaiawmoit ula wanrah ha iing dorbar ba ka district council kam iahap shuh ha kane ka juk mynta bad ula dawa da ka artikil 371.
U bah Prestone u la pynkynmaw ha ka por ba leit ban iakhih pyrshah ia ka Citizenship Amendment Bill (CAB) kaba kylla CAA (Citizenship Amendment Act) 2019, ka sorkar India ka la ong ba jait ba ka Meghalaya ka don ka Khyrnit ba Hynriew, ka CAB dei ban pyllait noh.
Ula kynthah ia ka jingma na ka artikil 371, da kaba ong ba lada ka wan ka 371, kan long kum ka tmier ka riat.
Ha prokram kaba la pynlong ha ka hall jong kane ka college la sakhi lang u CEM ka KHADC u bah Pyniaid Sing Syiem kum u Symbud Kongsan ryngkat u nongialam liangpyrshah ka dorbar thawain u bah Ronnie Lyngdoh, ki MDC u bah Bindo M. Lanong, bah Fantin Lakadong, bah Ransom Syntnga uba dei u chairman ka Rev. JJM Nichols Roy Memorial Committee, ki khynnah pule, ki pastor bad kiba shah khot sngewbha kila sakhi lang ha kane ka sngi.
Don u MLA ba wanrah da ka Motion ban pynduh ia ka District Council, ong bah Prestone
