SHILLONG: Ki nongtrei ka tnad ka koit ka khiah kiba khot ki ASHA (Accredited Social Health Activists kila rai ban shong sngi khlem leit trei naduh 30 tarik Risaw haduh ka 6 tarik Naiwieng 2023 ban pynpaw pyrshah ia ka jingkuman ka sorkar jylla ia ki jingdawa jongki.
Hapoh ka lama ka Meghalaya ASHA Workers’ Union (MASHAWU), ka la shim ia kane ka rai halor kane, ka long hadien ba ka jingiakren ki nongialam ka jingiakren bad ka myntri ka tnad ka koit ka khiah ka Kong Ampareen Lyngdoh ha kane ka sngi Nyngkong kam shym la urlong kaba seisoh.
Ka nongai jingmut ka MASHAWU ka kong Sony Kharjana, ka la ong ba ka mat jingdawa ka long ban kyntiew ia ka bai burom na T. 2000 shi bnai, ban ai bai sumar kaba lah ban dei jong ka MHIS lane kiwei pat ki skhim.
Ha kajuh ka por, ka la kam ba ki don katto katne ngut ki ASHA kiba shah weng noh ruh khlem kino kino ki daw ba shongnia hynrei tang namar ba ki iakynduh kam bym sngew tynnad bad u Rangbah Shnong.
Na ka liang ka kong Ampareen ka la pynthikna ban lum jingtip thikna shwa ban pyntreikam ia ka Meghalaya Health Insurance Scheme (MHIS).
Ka la ban jur ia ka jingdonkam ban pynkiew ia ka bai burom ia kiba trei ASHA, da kaba pynshong nongrim katkum ka jinglong ka iew ka hat bad ka jingrem ki mar ki mata.
Ka kong Ampareen kam shym la kular ia ka jingdawa kiba trei ASHA hynrei ka la ong ba kan rah ia kane ka jingdawa ka ASHA sha u Myntri Rangbah ka jylla u Conrad K Sangma ha ka 6 tarik Naiwieng 2023.
Rai shong sngi ki ASHA haduh 6 tarik, don ki ASHA ba shah weng kam ha u Rangbah Shnong
