SHILLONG: Ka nongbah Shillong ka mad ia ka jingshyrkhei bha ki kam tuh kam thiem bad kawei ka daw kaba ialam sha kane kam, ka dei na ka jingjyllei u drok.
Ka kam tuh kam thiem kam dei tang ha kano kano ka shnong hynrei ka jubor bha ha ki bynta ka nongbah Shillong baroh kawei bad kawei na kine ki shnong kaba mad ia kane ka jingjyllei ki kam tuh, ka dei ka Laitumkhrah.
U rangbah shnong ka Laitumkhrah Pyllun u bah Andrew A Jyrwa u la pynpaw ia ka jingsngew khia jur ia kane ka jingjyllei ki kam tuh ha ka shnong wat ha ka por myn sngi ruh. U bah Andrew u la iathuh ba ka jingshlan kine ki nongtuh ka long kaba shyrkhei bha.
Namar ka jingjur ki nongtuh, ka la pynbor ia ki nongkitkam shnong, ki seng longkmie bad ka seng samla ban mih ban iaid shnong wat mynmiet ruh.
U la sngew bitar jur ia ka jingkynrei ki nongtuh kaba la ktah ia ka imlang sahlang bad ka shnong ka thaw haduh ka shongsuk shongsyier.
U la kyntu ia ki nongshong shnong ne ki trai iing kiba lah ban buh CCTV bad ban ai jingtip wut wut sha ka shnong bad ki pulit haba don kano kano ka jingshah tuh.
U la ong ba lyngba ka Smart City Project, ka shnong ka la iaid bad surbe ban buh ia ki ding surok, ki CCTV khnang ban iada bad iarap ia kino kino ki kam tuh kam thiem, ban wanrah ka shongsuk shongsain bad ban pynshynrain ia kiba ju mlien ban shong kyndong ban iadih bad ban ai ka jingshnain ia ki nongshong shnong bad ki paidbah.
Jyllei ki nongtuh na u drok, wat ia ka CCTV ruh kim tieng
