SHILLONG: Ka dorbar shnong Laitumkhrah kan pyrkhing bha ban ai jingbit ia ki briew ban die madan ynda la pyntreikam ia ka kyndon ba ka sorkar jylla ka dang pynkhreh. Ka Laitumkhrah ka dei ka jaka kaba bunkam bha namar ba ka dei ka jaka ha kaba ka don ka iew, ki skul ba bun tam ki don ha kane ka shnong, bad nangta nalor ki ophis sorkar.
Ka shnong Laitumkhrah ka khring ia baroh ban wan leh kam khaii namar ba ka dei kaba khuid, ka don ka iew ha kaba ki briew ki ioh lut baroh ki jait mar ban thied bad baroh ki briew shnong ha sor ki mareh beit sha Laitumkhrah.
Haba kren mynta ka sngi, u Rangbah Shnong ka Laitumkhrah u bah Andrew A Jyrwa u la ong ba naduh ka por 7baje mynstep, ka Laitumkhrah ka la kynduh ia ka jingeh ha ka leit ka wan ha surok ter ter jan baroh shi sngi.
Ka dorbar shnong ka la iai buddien bad ka sorkar ban pynsted ban pynbeit noh ia ki nongdie madan, ia ki jaka ban shong ym ban shu die pathar kat shaba lap ba shem, namar ba la don teng ka jingjia ha kaba la don I kong ba mynsaw ba shah tynrah ha ka kali.
U bah Andrew u la ong ba ka dorbar shnong ka sngew ban iadon bynta bad ka sorkar ban pynbeit ia kane kam, kaba ktah ia kiba bun kiba lang.
Ha ka jingshim kyrteng ia ki nongdie madan ha ka thain Laitumkhrah, ki don palat spah ngut ki nongdie madan bad kumba 90 percent kiba die madan ha Laitumkhrah ki dei kiba wan nabar shnong bad tang khyndiat kiba dei na shnong Laitumkhrah.
U bah Andrew u la ong ba lada donkam ban shim kyrteng biang ia ki nongdie madan ruh, ka shnong ka long kaba kloi katkum ka jingdonkam ka sorkar.
Halor ka jingkhot ka KHADC ban rejister ia ki nongdie madan kiba dei ki trai shnong, u bah Andrew u la ong ba ka dorbar shnong kam pat iakren halor kane namar ba kam long ban shu ai NoC ban die madan pathar ha kano kano ka jaka khamtam ba ka la don ka jaka kaba la buh ia ki nongdie madan.
Ha kajuh ka por, u la ong ba ka shnong kam lah ban shu ai jingbit pathar iano iano kat kiba wan naei naei khlem ki kot ki sla kiba biang khamtam ki bym dei Khasi.
Hap iaid ki briew ha surok ba jyllei ki nongdie madan ha Laitumkhrah
