SHILLONG: Hadien ka jingmih ha ki lad pathai khubor ba ki don ki kynhun ba la kam ha ki seng bapher bapher kiba ju dawa pisa na ki nongkhaïi, ki pulit hynne ka sngi Palei ki la ioh kem ia 4 ngut ki briew na Shillong kiba la leit ban dawa pisa ha ka kyrteng jong ki seng ki bym pat ju ïohsngew myno myno ruh.
Katkum ka kyrwoh ba la phah da u SP (City), u Bah Vivek Syiem, ka jingdawa pisa ka long ha ka kyrteng jong ki seng kum ka Hynniewtrep People Defence Alliance (HPDA), ka United Khasi Movement (UKM), ka Federation of Khasi United People (FKUP), ka Confederation of Meghalaya People (CMP), ka Khun Hynniewtrep Youth Council (KHYC) bad ka Hynniewtrep Youth Region (HYR).
Hadien ka jingioh jingtip ia ka don ka jingdawa pisa ha ki iew, kum ha Khyndailad (Police Bazaar) bad Iewduh, ki pulit na ka Special Cell ka East Khasi Hills kila pynlong ia ka jingpynapshrip la bun sngi ha kine ki jaka iew bad hynne ka sngi, kila ioh kem ia 4 ngut ki briew na Police Bazaar katba ki dang sam shithi dawa pisa sha kawei ka dukan.
Na ka liang ki pulit ki la shim da ka Suo-Moto case halor kane ka kam runar jong kitei ki 4 ngut ki briew ha Sadar Police Station. Na kitei ki briew ki pulit ki la ioh ban kurup ruh bun tylli ki slip bad shithi daw pisa.