SHILLONG: Ka Khasi Author Society (KAS) mynta ka sngi ka la leit ban iakynduh ia Myntri Rangbah ka jylla u Conrad K Sangma ban kyntu ban wanrah ia ka jingpynkylla (Amendment) ia ka Meghalaya Language Act,2005.
U President ka KAS u Dr DRL Nonglait haba kren sha ki lad pathai khubor, u la ong ba hapoh ka Meghalaya Language Act,2005, la kdew ba ka Khasi bad Garo ki dei ki ktien bynrap (Associate Language) namarkata la dawa ba dei ban pynkylla ban pynlong noh ia ka Ktien Khasi kum ka ktien sorkar jong ka jylla.
Haba iadei bad ka jingdawa ban pynrung ia ka ktien Khasi ha ka khyrnit ba phra jong ka riti synshar ka ri, u Dr Nonglait u la ong ba ki la pyntip sha u Myntri Rangbah ba ha ka 29 bad 30 tarik Nailur,2023, ka KAS ka ladep pynlong ia ka Seminar ha nongbah Delhi bad la pynlong ruh ia ka jingshong kyllain Morngor.
U Dr Nonglait, u la ong ba na kane ka jingiakhih ba jai jai, ki la shim ia ki katto katne ki rai kata ka long ban pan ia ka jingtip jingpynshai na ka tnad Kam Pohiing ka sorkar pdeng hangno ka jingdawa ban pynrung ia ka ktien Khasi ka la don mynta bad ban kyntu ia ka sorkar India ban wanrah ia ka Ain Rew ban ithuh ia ka ktien Khasi (Official Bill) na bynta ban plie lad ban pynrung ia ka ktien Khasi ha ka khyynit ba phra ha kane ka Iing Dorbar Parliament kaban sa shong shen.
Dawa ka KAS ban pynrung ktien sorkar jylla ia ka Khasi
