SHILLONG:Ka jingpluh jong kawei ka ïingmala (building) kaba don ha Jail Road, Khyndailad ka la Wanrah ka jingiap noh jong uwei u briew uba don ha kawei ka kamra kaba don ha katei ka building, bad la iathuh ba ka jingiap jong utei u briew kadei namar ka jingshah set up bad hap rung mynsiem ia ka tdem kaba mih na ka jingpluh ding.
Na ka liang u SP ka East Khasi Hills, u Bah Sylvester Nongtnger u la pynthikna ia kane ka jingiap jong uwei u briew ha katei ka jingjia ba kadei na ka daw jong ka tdem, bad haduh ba wanrah ia kane ka khubor ym pat shym la ioh jingtip pat la ki don ne em kiba la mynsaw, namar hadien ba la mih katei ka jingpluh ba shyrkhei kiba bun ki briew kiba don ha katei ka building ki la mih shabar bad don ruh kiba la leit ban pyllait da ki pulit Fire Service.
Ka jingpluh hynne ka sngi ka long kaba ishyrkhei bad ka la jia ha ka por kumba 1: 45 eiei mynsngi, bad ia ka daw kadaw jong ka jingpluh ym pat lah ban pynthikna haduh mynta, hynrei naduh ba la mih katei ka jingpluh ding la suba ba ka lah ban dei na ka jingbthei ka tyndong shet (gas cylinder).
Ïap uwei na ka tdem jong ka jingpluh ding ha Jailroad
