SHILLONG: U President ka North Eastern Hills University Teachers Association (NEHUTA) u Prof. Lakhon Kma u la ong ba kam kwah ban leh kyrkieh ban pyntreikam ia ka National Education Policy (NEP) ha ka Undergraduate.
Mynta ka sngi ka NEHUTA ka la pynlong ia ka jingiakhih rah plakad ban pyrshah ia ka jingrukom pyntreikam ia ka NEP namar ba la shu leh kyrkieh bad ka la dawa ban khot ia ka jingialang ka Academic Council.
U Prof. Kma u la ong ba u ngeit skhem ba u Vice Chancellor ka NEHU un kylla ba mut noh shen bad lada um kylla bamut ha kine ki shiphew sngi ban wan bad lada ym kylla ban pynsangeh shwa ia ka jingpyntreikam ia ka NEP, kin sa leit iakhih biang ha NEHU.
U la ong ba ka NEHU kam dei ka iing jong u VC ba un lah ban leh katba u mon kum ka iing lajong namar ba ha NEHU la ju beh bun ki VC bad ym salia ban beh ia une uba mynta ruh u Prof. PC Shukla.
U la kynnoh ba u VC u la pynjah ia ka rai jong ka Academic Council kaba 110 bad kane ka pynpaw ba ka don eiei ha lyndet hynrei hadien katto katne sngi u la ong ba la rai ban pyntreikam ia ka NEP 2023 bad u la kwah ban leh kyrkieh ban shu pyni sha Delhi ba u la leh watla u shu shong ha kine ki ar snem ba la leit.
Prof. Kma u la ong ba ka jingdawa ka long ban pyntreikam ia ka NEP 2024-25 ym ban shu leh kyrkieh.
Ha kajuh ka por, ka Meghalaya College Teachers Association ruh ka la iashim bynta lang ha kane ka jingiakhih ka NEHUTA. U General Secretary ka MCTA u Babu Airpeace Rani u la kynnoh ba une u VC u dei kum ka JCB uba shu kyntur bad thom naphang khlem iaid katkum ki lynti.