SHILLONG: Ka Hynniewtrep Integrated Territorial Organisation (HITO), ka la dawa na ka sorkar jylla ba dei ban don ia ka polisi ha ka bhah pule ia ki samla kiba kwah ban pule ha ki kyrdan jingpule ba kham hajrong.
Ha kane ka sngi ka HITO, ka leit ban aiti ia ka jingthoh Myntri ba khmih ia ka tnad Ain ka Dr Ampareen Lyngdoh ban dawa ba ka sorkar kadei ban shna da ka Polisi ha ka rukom bhah ha ka jingpule ba kham hajrong kum ki Engineer, Doctor bad kiwei de.
U President ka HITO u bah Donbok Dkhar haba kren sha ki lad pathai khubor u la ong, ka seng ha ka jubab katkum ka jubab ba la iohpdiang lyngba ka RTI, la kdew ba kam shym la don kano kano ka jingpynbna (Notification) na ka tnad Pule Puthi ban don ka bhah pule.
U bah Donbok u la ong, “Katba dang iakren ka Expert Committee, ngi thoh sha ka sorkar jylla ba nangne shakhmat haba iadei bad ka bhah pule dei ban pynmih da ki kynja Notification lane ban rah ha ka cabinet bad wanrah da ka ordinance na bynta hynriew bnai khnang ba kiba dei hok ban ioh kin ioh lyngba ka bhah pule.”
Katkum ka jingong u President ka HITO, la ong ba na ka liang ka Myntri ka la kular ba kan rah ia kane ka mat sha u Myntri Rangbah ban ia iakren ban pynsngew halor ka jingai jingmut jong ka seng.
Ha kajuh ka por, ula ong ba lada ka sorkar kam lah ban shna da ka Polisi haba iadei bad ka bhah pule, kim banse ban leit ban rah sha ka Iing Kashari.