SHILLONG: U President ka Khasi Authors’ Society (KAS), u Dr DRL Nonglait u la ong ba ka shong ha ka Sorkar India ban peit, lah ne em ban pynrung ar tylli ki jait ktien na kane ka Jylla khamtam ba ka Meghalaya kadei ka Jylla kaba rit, bad kumjuh namar ba kiwei ki Jylla ruh ki buh ia kum kine ki jingdawa.
U la ong ba ka jingdawa jong ka KAS naduh kaba sdang ka long ban ithuh ia ka ktien Khasi ha ka Khyrnit kaba Phra, hynrei hadien ba ka Sorkar ka la shim ia kane ka mat ka la mynjur lang ia ka rai (resolution) hapoh ka ïingdorbar thawaiñ ban ithuh lang ruh ia ka ktien Garo. Hynrei u la ong ba ka jingkwah jong ka KAS ka long ba ka Sorkar India lane ka Sorkar Jylla kim dei ban ong ba hap ioh baroh ar lane ban ong ynnai lada ioh jingithuh tang kawei ka jait ktien.
Ha kawei ka liang u Dr Nonglait ban ong ba ka jingsuki ban ioh jingithuh ia ka ktien Khasi kadei ka jingbakla lynti ha kaba iadei ban buh ia kane ka jingdawa hapoh ka Home Minsitry ha kip or ba la dep, bad bynrap ba ha kito ki por la dawa tang ki MP khlem ka jingiatreilang lane ka jingthoh kaba shai na ka Sorkar Jylla kaba pynlong ia ka KAS ban dawa na ka Sorkar ban mynjur ia ka kawei ka rai (resolution).