SHILLONG:Ki nongialam jong ka Khasi Students Union East Jaintia Hills District Unit, ki la pynpaw ka jingsngew khia halor ka jingbym ia snoh kti lang jong baroh ki nongniah kali kiba ju iaid lyngba na ka surok national highway-6 ha East Jaintia Hills District, ki bym burom lem ia ka jingkyrpad ka seng, kaba la buh ka jingkyrpad ban sangeh ban iaid kali ha ka por mynmiet naduh ka por 7 baje mynmiet haduh ka por 5 baje mynstep.
Kane ka jingbym ia snohkti lang jong baroh ki nongniah kali ka paw ba imat ki sngewtynnad beit ban iaid ha ka surok kaba la jot rathai ruh.
Ha ka kyrwoh, u General Secretary jong ka KSU East Jaintia Hills District, u bah K.S.Suchiang, u la ong ba kane ka jingkyntu ia baroh ban sangeh ban niah kali la lap ba ki don bun na ki nongniah kali ki bym treh ban ia snoh kti lang bad ka seng, namar ki don tang shi pawa kiba la ia snoh kti lang bad ka seng ki bym iaid kali shuh ha ka por mynmiet bad, kane ka paw ba imat ki nongniah kali ki sngewtynnad, ki kmen beit ban iaid watla ka surok ka sniew bad jot rathai.
Ha ka jingshisha ka seng ka kwah eh ba baroh ki paidbah kin suk ha ka leit ka wan da kaba iaid na ka surok kaba bha ba miat bad ka seng ka ju sngap ruh ia ki jingud jong ki paidbah kiba kynduh jingeh ha ka leit ka wan bad ka seng ka la shim ruh ia ka sienjam ban pynlong da ka jingiakhih, hynrei balei pat ki paidbah khamtam kiba niah kali kim treh pat ban iashim bynta lang haba ka seng ka kyntu bad kyrpad ban sangeh ban niah kali ha ka por mynmiet ban long kum ka dak ban pynpaw ia ka jingpyrshah halor ka jingleh bymsuidniew ka NHAI bad sorkar jylla.
Ka jingkyrpad jong ka seng ban ym iaid kali ha ka por mynmiet ka la kut noh hynnin ka sngi 02/10/2023 por 5 baje mynstep bad ka la dap shi taiew kynthih, kata naduh ka 25 tarik u nailur.
Halor ka jingbym sngap ka NHAI ia ka jingdawa ban maramot noh mardor ia ka surok, u nongialam jong ka KSU na East jaintia Hills District, u la ong ba ka seng kan sa shong pyrkhat biang halor kane ka jinglong jingman ka surok NH-6.
Kumba long mynta, ka surok bah national highway ha East jaintia Hills District, khamtam ha ka thain Narpuh ka la buh jingma bad buh jingeh bha ia ki paidbah nongleit nongwan, ka jingdheng kali ruh ka jur bha ha katei ka thain na ka daw ka jingsniew palat ka surok. Ka NHAI kam dei ban shu lape hynrei ka dei ban siang rong noh namar ka bneng ka la shah ban leh kumta.
Ka NHAI kam dei ban shu lape hynrei ban siang rong noh namar ka bneng ka la shah ban leh kumta: KSU EJH
