SHILLONG 03, Jymmang: Ka sorkar jylla ka la pyntreikam ia ki bos leit on bad shwa skul ha ki katto katne ki bynta jong ka nongbah Shillong. Ia kine ki bos ba khot lyngkhot bos STEMS (Sustainable Transport and Efficient Mobility Society), la pyllait ha kane ka 2 tarik Jylliew.
Ka jingthmu ba kongsan jong kane, ka long ban pynduna ia ka jingkhapngiah bad sahkut ki surok ha Shillong.
Ha ka bynta ba nyngkong, la pynlait 30 tylli kine ki bos ban iaid na Umpling Football Ground sha Pine Mount School. Ki don 12 tylli ki jaka pynhiar bad pynkiew briew naduh Umpling Football Ground, Nongrah Presbyterian Church, Nongrah Mawshyieng, Nongrah, Lapalang Junction, Lumbatngen (Law U Sib), Demthring Bus Stop, Nongkhyriem, Nongthymmai, Jylli Shop, Fire Brigade, and Pine Mount Back Gate.
Ha kine ki bos STEMS ki kmie ki kpa ki lah ban buddien ia ki bos bad ki lah ban kam jaka lypa ia la ki khun da kaba leh online. La buddien ia kine ki bos da ka GPS bad la pyndait 5 tylli ki camera.
Lyngba ka jingiatreilang ki tnad kum ka Shillong Traffic Police, MTC, NIC, PWD (Roads) bad kiwei ki tnad, yn pynthikna ba kin ai ia ka jingshakri kabab ha ia ki khynnah skul ha ka nongbah.
H
aduh mynta, la don 455 ngut kiba la rejister bad palat 250 ngut ki kmie ki kpa kiba twad jingtip.
Ka la don ruh ka jingthmu ban kit nongleit trei ophis, bad kiwei ki nongleit nongwan ha ki sngi ban wan, khnang ban pynduna ia ka jingsahkut kali bad ban pynduna ban pyndonkam ia ki kali shimet haba leit ba wan ha ka nongbah. Kane ka long ka kyrwoh na ka kong Isawanda Laloo, IAS, ka Chief Executive Officer Sustainable Transport and Efficient Mobility Society (STEMS), Shillong.