SHILLONG, 01, Jylliew: U Myntri Rangbah ka jylla u Conrad K Sangma mynta ka sngi u la pyllait paidbah ia 20 tylli ki kali ba la aiti sha ki kynhun nongrep bapher bapher ba kin pyndonkam ban kit mar rep jong ka East Khasi Hills bad ka Jaintia Hills.
Ia kine ki kali la pynioh ka sorkar lyngba ka skhim Prime Agriculture Response Vehicles (PARV) bad la pyllait ha ka jingialang ha MAMETI, Upper Shillong ha ka jingdon lang ka myntri ka tnad ka rep ka riang ka Kong Ampareen Lyngdoh, ka Secretary ka tnad ka rep ka riang ka kong Isawanda Laloo bad ki nongrep.
Haba kren ha kane ka jingialang, u Myntri Rangbah u la ong ba ha kine ki khyndiat snem ka tnad ka rep ka riang kala shim khia bha ban wanrah ia ki tiar juk stad ha ka rep ka riang ban kyntiew ia ki nongrep ha ka kamai kajih jongki.
“Kumba 80 percent ki briew kiba shong ha ka jylla ki dei ki nongrep bad ka long kaba donkam ba ki nongrep jong ngi kin ioh ia ka jingkyrshan na ka sorkar lyngba ki prokram jong ka sorkar”, la ong u Conrad.
U la ong ba kumba 50 hajar ngut ki samla kiba trei ba ktah ha ka jylla bad ki tnad sorkar bad ki bym dei sorkar, ki dei ki lad ban ai kam ai jam ia ki nalor ka rep ka riang. Tang ha ka tnad sorkar kumba 3 hajar hynrei kiwei ki trei ha ki kam bym dei jong ka sorkar ba kynthup ha ki riew shimet, ki kompeni.
“Ha ki kam bym dei sorkar, ngi hap ban peit ia ka rep ka riang, ka karkhana shna jingbam, ka kam jngohkai, bad kiwei ki kam shakri kum ki lad ban ioh kam ioh jam, lym kumta ngim lah ban plie ia ka lad ioh kam jong ki samla.”, u la ong.
U la ong ba khnang ban wan seng kam ki kompeni nabar sha kane ka jylla, ka donkam ia ka shong suk shongsain. “Haba ngi pyrshang ban kyntiew ia ka kam bym dei sorkar ha ka jylla, ka kam rep kam riang ka dei bad ka karkhana shna jingbam, ki dei ki bynta ba donkam ban kyntiew ia ka ioh ka kot jong ki paidbah bad ban thaw kam thaw jam”, u la bynrap.
Ha kane ka sngi, u Myntri Rangbah u la pyntip ba yn pyllait 200 tylli ki kali hapoh ka skhim Prime Agriculture Response Vehicles ha ki sngi ban wan.
Ha kane ka skhim Prime Agri Response Vehicles, ia kine ki 200 tylli ki kali, yn aiti sha ki Cooperative societies, Self Help Groups, Farmers Producer Organizations bad kumjuh sha ki riew shimet ha ka jingiarapa kaba 50 percent na ka sorkar.
Kane ka skhim ka thmu ban pynsuk ia ki nongrep ban wankit ia ki mar rep sha ki iew ki hat.
la pynlait paidbah ruh ia ki Apps ban iarap ia ki nongrep kum ka CROPSAP, Crop Pest Surveillance bad ka Advisory Project, Crop Pest Surveillance bad Advisory Project Management System, Horticulture Hub MIS, MEGAMB, Meghalaya State Agriculture Marketing Board, Meghalaya Farmer App bad ka MAMETI website.