SHILLONG 30, Jymmang: Ka jingshah thngan u President ka Voice of the People Party (VPP), ka lah ban kut noh lada ka jingialang lashai ka sngi, ka ioh ia u soh thiang ha ka jingialang ban iathir halor ka Roster bad ka Reservation Policy.
Ka VPP kan leit iashim bynta ha ka jingialang lashai hadien ba ka sorkar jylla ka la pyndem ha ka jingdawa ka VPP ba dei ban iakren ban pynbeit ia ka Reservation Policy, ym ia ka Roster system.
Ha ka jaka shah thngan u bah Ardent mynta ka sngi, u MLA ka VPP na Mawlai u bah Brightstarwell Marbaniang u la pynbna ba ka parti kan leit iashim bynta ha ka jingialang hynrei kam mut ba kan pynkut ia ka jingiakhih khlem pat ioh ia u soh kumba la angnud.
“Katba ka jingiakren ka dang iaid, ka jingiakhih ruh kan bteng beit bad lada ka jingiakren kam seisoh, ka jingiakhih kan bteng”, la ong u bah Brightstarwell.
Na ka liang ka Sorkar ka la pynthymmai ia ka Reservation Roster committee da kaba pynkupbor ba kan iakren iathir sani ruh ia ka ain bhah kam lane ka Reservation Policy, bad ia ka jingai jingmut halor kane dei ban phah sha ka Sorkar hapoh shibnai.
U nongialam ka VPP u la ong ba kane ka jingkohnguh jong ka Sorkar ban iakren ia ka Reservation Policy ka dei shi bynta ka jingjop, hynrei ka party kan nym pat sangeh pat ia ka jingiakhih.
Kane ka jingkhot iakren ka sorkar ia baroh ki seng sain pyrthei kynthup ia ka VPP, ka dei hadien ba ka sorkar ka la mynjur ban pyniar ia ka mat jong ka Committee ba kan ktah ia ka Reservation Policy, ym tang ia ka Roster system.
Katkum ka jingpynbna ba la pynmih mynta ka sngi ka 30 tarik, ka Sorkar ka la pynthymmai ia kane ka committe ba la khlieh da ka Myntri ba khmih ia ka kam Aiñ, bad la kynthup ruh ban ailad iakren ia ka Reservation Policy nalor jong ka Roster System, shuh shuh ha kane ka committee la ailad ban mihkhmat lai ngut na manla ki seng sainpyrthei.
Ia kane ka committee la ai por shibnai ban iathir iatai halor ka jingpyntreikam ia ka Reservation Roster bad ia ka State Job Reservation Policy, bad ban phah pat sha ka Sorkar ia ki jongai jingmut.
Ka chairperson jong ka Reservation Roster Committee, ka Kong Ampareen Lyngdoh ka la pynpaw ba ka jingiakren halor ka Roster kam lah lait na ka Reservation Policy, bad na ka liang ka committee ka la pan jingbit na ka Sorkar ban pyniar ia ka jingiakren ban kynthup lang ia ka jingpyrkhat pynbeit thymmai ia ka Job Reservation Policy.
Lah ruh ban kdew ba kane ka jingmynjur jong ka Sorkar ka la mih hadien shitaiew thik ba u nongialam ka Voice of the People Party (VPP) u la sdang ia ka jingiakhih da kaba shong shah jingit ha ka jaka ïeng kali kaba don ha Additional Secretariat, halor ka nongrim ban dawa na ka Sorkar ban pynbeit thymmai ia ka aiñ bhah kam, ym ban iakren tang ia ka jingpyntreikam ia ka Roster System.