SHILLONG 28, Jymmang: Ka Seng Khasi Laitkor Pyllun, ha ka 28 tarik Jymmang ka la plie pyrda ïa ka jingrakhe dap 50 snem ka jingïaid lynti naduh ba la seng ïa ka.
Ha kane ka sngi, la sdang ïa ka prokram da ka nguh ka dem na u Tymmen u San, u Bah Hambok Khar-mawphlang ha kaba la don pat sa ka jingkyntiew lama da u Syiem ka Hima Mylliem, u Paiem Ainam Manik Syiem ha ryngkat ka jingdonlang ki rangbah niam na ka Seng Khasi.
Shuh shuh, la ïohsngew ïa ka jingkren na u Vice – President ka Seng Khasi Laitkor, u Bah Throshon Mylliemngap ha kaba i la ïathuh ïa ka histori lane ka jingïaid lynti ka Seng Khasi Laitkor ha ki snem ba la dep. Ryngkat ka jingkren na u Bah Throshon, la don pat kiwei ki rangbah bad ki longkmie kiba bynrap jingkren ha kane ka sngi.
Ha kane ka sngi la ïadon lang u Syiem ka Hima Mylliem, u Paiem Ainam Manik Syiem, u Kongor ka Hima khyrim bad kiwei kiwei.
Ki riew rangbah ba kynthup ïa ki longkmie na ka seng khasi Laitkor ki la.sngewdei ban don noh la ka jong ka tnad seng naduh u snem 1974 namar ka jingwan ki niam na shiliang duriaw kaba lah ban ktah ïa ka.long tynrai jong ka jaitbynriew khasi. Kumta ki la sngewdei ban shim ïa ka sienjam ban don noh laka jong ka tnad seng hapoh Laitkor ha kaba ha u snem 1974 ki la sdang ïa ka Seng Khasi Laitkor. Ha kine ki snem ba la dep, Ka Seng Khasi Laitkor ka la lah ban ïoh la ka jong ka ïing seng, u lum jynthang bad kumjuh ki la lah tehsong ïa ki parariewseng ki ba bat ba ksoh ha la ka niam khasi tynrai ban ïai bat ïai buddien ïa ka jinghikai u lomgshuwa man shuwa khnang ban nang janai shuh shuh ki pateng ki ba mynta.
Ka Seng Khasi Laitkor ka la lah ruh ban pynlong ïa ka Shad Suk Mynsiem kaba 15 ha u snem 2023 ka ba ka la long kaba iphuh iphieng.